აშშ-ის ფედერალურმა მოსამართლემ კარლ ნიკოლსმა შეაჩერა პრეზიდენტ დონალდ ტრამპის განკარგულება, რომელიც ითვალისწინებს აშშ-ის საერთაშორისო განვითარების სააგენტოს (USAID) თანამშრომელთა უმეტესობის ადმინისტრაციულ შვებულებაში გაშვებას.
მოსამართლის მიერ ამ განკარგულების შეჩერება დროებითი ღონისძიებაა, რაც საჭიროა იმისთვის, რათა მას მიეცეს შესაძლებლობა, საკითხი უფრო დეტალურად შეისწავლოს.
მოსამართლის გადაწყვეტილებამდე მოსალოდნელი იყო, რომ USAID-ის თანამშრომელთა უმეტესობა იძულებით ადმინისტრაციულ შვებულებაში უნდა გასულიყო და სამუშაოდ მხოლოდ რამდენიმე ასეული ადამიანი დარჩებოდა.
3 თებერვალს ცნობილი გახდა, რომ დაიხურა USAID-ის ვაშინგტონის სათაო ოფისი. იქ დასაქმებულ პერსონალს კი ელექტრონული ფოსტით აცნობეს, რომ მათი სამსახურში გამოცხადება აღარ იყო საჭირო.
იმავე დღეს გავრცელდა ინფორმაცია, რომ დონალდ ტრამპმა USAID-ის ადმინისტრატორის მოვალეობა სახელმწიფო მდივან მარკო რუბიოს დააკისრა.
რამდენიმე დღით ადრე, ულტრამილიარდერმა ილონ მასკმა, რომელიც მთავრობის ეფექტურობის დეპარტამენტს უდგას სათავეში, კრიტიკის ქარ-ცეცხლი დაატეხა თავს USAID-ს და მას კრიმინალური ორგანიზაცია და "გველების ბუდე" უწოდა.
სააგენტოს კრიტიკაში მასკს მიემხრო პრეზიდენტი ტრამპი, რომლის თქმითაც USAID-ს "რადიკალი შეშლილები" მართავენ.
USAID-ი, რომლის წლიური ბიუჯეტი თითქმის 43 მილიარდი დოლარია, პასუხისმგებელია უცხოეთის ქვეყნებისთვის აშშ-ის დახმარების მართვასა და განვითარების სფეროში თანამშრომლობაზე.
2025 წლის იანვარში დონალდ ტრამპმა USAID-ის პროგრამები 90 დღით შეაჩერა აშშ-ის საგარეო პოლიტიკურ კურსთან მათი შესაბამისობის დადგენამდე.
USAID-ს 10 000 მეტი თანამშრომელი ჰყავს, რომლის ორი მესამედი საზღვარგარეთ 60-ზე მეტ ქვეყანაში და რეგიონულ მისიაში.
