კლინიკა "ვივამედის" დირექტორი, ზურაბ ჩხაიძე აცხადებს, რომ "ნეტგაზეთისა" და "ბათუმელების" დამფუძნებელს, მზია ამაღლობელს აუცილებელი ლაბორატორიული და ინსტრუმენტული კვლევები ჩაუტარდა.
ჩხაიძემ "ფორმულასთან" თქვა, რომ ამაღლობელი მკურნალობას სტაციონარის პირობებში აგრძელებს.
"მე შემიძლია დაგიდასტუროთ, რომ კლინიკა "ვივამედში" საღამოს საათებში შემოყვანილი იქნა პაციენტი მზია ამაღლობელი. მას ჩაუტარდა აუცილებელი ლაბორატორიული და ინსტრუმენტული კვლევები. ანალიზის შედეგების ნახვის შემდეგ, პაციენტი აგრძელებს მკურნალობას სტაციონარის პირობებში.
პაციენტი ჩვენთან შემოვიდა კონტაქტური, ადეკვატური, გონების კარგვის ეპიზოდი კლინიკაში არ ყოფილა. მისი გადმოცემით, მას არ აღუნიშნავს გონების კარგვის ეპიზოდი [სასჯელაღსრულების დაწესებულებაში]. მას ჰქონდა გარკვეული ჩივილები, რაც ზოგადად ახასიათებს შიმშილის ეფექტს და აქედან გამომდინარე, ჩატარებული იქნა ყველა აუცილებელი კვლევა, რაც საჭიროა ამ კონკრეტულ შემთხვევაში. ჩივილები [ჰქონდა], რაც დამახასიათებელია, კონკრეტულად ვერ დაგისახელებთ, მაგრამ რაც ზოგადად ახასიათებს შიმშილის ეფექტს. სტაბილურია, კონტაქტურია.
შეთავაზებული იქნა ინფუზიური თერაპია, რასაც პაციენტი დათანხმდა და ჩაუტარდა. შეფასდება მისი მდგომარეობა და მდგომარეობიდან გამომდინარე შემდეგ უკვე გეტყვით, რა და როგორ, ანუ, გადაწყდება, გააგრძელებს კიდევ რამდენიმე დღე [კლინიკაში მკურნალობას] თუ როგორ იქნება.
რა თქმა უნდა, გარკვეული ცვლილებები არის ანალიზებში, კიდევ განვმეორდებით, ჩაუტარდება ლაბორატორიული კვლევები, თუ საჭირო გახდება, ინსტრუმენტული კვლევებიც და მისი მდგომარეობის შესაბამისად, შემდგომ გადაწყდება მკურნალობის ტაქტიკა და ხანგრძლივობა", - განაცხადა ჩხაიძემ.
