მე მაწამეს, მაგრამ ვერ გამტეხეს. მე დამკავეს, მაგრამ თავისუფლება ვერ წამართვეს, - ამის შესახებ საპროტესტო აქციებისას დაკავებულმა, სამოქალაქო აქტივისტმა საბა სხვიტარიძემ დღევანდელ სასამართლო პროცესზე განაცხადა.
„მე დამაკავეს იმის გამო, რომ მე და ჩემთან ერთად მყოფებს თავს დაგვეხსა ტიტუშკა. ეს არ იყო პოლიციელი, ეს იყო ტიტუშკა, რომელსაც არანაირი ამომცნობი ნიშანი არ ჰქონდა. ეცვა ჩვეულებრივად, კაპიშონი ეხურა, პირბადე ეკეთა. იძალადა ქალზე, გვაგინებდა და ჩვენ მიმართ აგრესიით გამოირჩეოდა. მე მოვიგერიე ის. ამის გამო მე გამიტაცეს, მაწამეს განყოფილებაში ორჯერ, რის შემდეგაც, ეს არ იკმარეს და მკაცრი რეჟიმის იზოლატორში გამამწესეს და დამაბრალეს პოლიციელზე ძალადობა, რაც არის სრული აბსურდი.
თუ ვინმეა ამ საქმეში დამნაშავე, არის ის ტიტუშკა, მირიან ქავთარაძე და მოძალადე პოლიციელები, რომლებმაც ჩემზე იძალადეს და ამ საქმეში მე დაზარალებულადაც მცნეს. ამ დრომდე არც ერთი პოლიციელი არ არის დაზარალებული”, – თქვა საბა სხვიტარიძემ.
მან ასევე სხვა დაპატიმრებულების შესახებაც ისაუბრა.
„მე მაწამეს, მაგრამ ვერ გამტეხეს. მე დამკავეს, მაგრამ თავისუფლება ვერ წამართვეს.
სასამართლოს ყოველი უსამართლო გადაწყვეტილებით საქართველოს და ქართველი ხალხის დემოკრატიულ მომავალს უქმნით საფრთხეს. ძირს უთხრით ევროპულ მომავალს და მიგვაქანებთ რუსეთში, ირანსა და ჩინეთში. როგორ შეიძლება, ასობით, შეიძლება ათასობით ადმინისტრაციულ სამართალდარღვევაზე და სისხლის სამართლის 53 საქმეზე ყოველთვის პროკურატურა იყოს მართალი, ერთხელ მაინც არ შეცდეს და ერთი მოქალაქე მაინც არ გამართლდეს. რანაირი პრაქტიკაა ეს. ღმერთზე მართლები როგორ არიან ეს პროკურორები. ეს არის დიქტატურა, ეს არის უსამართლობა.
მე არ ვიცი, რას გიხდიან ან რით გაშინებენ ამ ახალგაზრდების ცხოვრების დანგრევისა და უკანონობის დაკანონებისთვის. თუმცა, მოვა დრო და ხალხის წინაშე გადაიხდით ვალს. მოვა დრო და ხალხი გამოგიტანთ განაჩენს თქვენი ყოველი ქმედების გამო. იფიქრეთ მომავალზე, იმ მომავალზე, რომელსაც თქვენ თქვენი გადაწყვეტილებებით ახალგაზრდებს ართმევთ.
დღეს შეიძლება მე დამაკავეს, მაგრამ ყველას ვერ დაგვიჭერთ. ქართველი ხალხი არ დათმობს ევროპულ მომავალს, ქართველი ხალხი არ დაიჩოქებს პოლიციური რუსული რეჟიმის წინაშე. მოვა დრო და როცა გამოუყენებლები იქნებით, რეჟიმი თქვენც მოგიშორებთ.
თავისუფლება რეჟიმის ტყვეებს,
თავისუფლება მზიას”, - თქვა საბა სხვიტარიძემ.
თბილისის საქალაქო სასამართლოს მოსამართლე ნატო ხუჯაძემ საბა სხვიტარიძე პატიმრობაში დატოვა.
საბა სხვიტარიძე სისხლის სამართლის წესით 5 დეკემბერს დააკავეს.
მას ბრალდება სისხლის სამართლის კოდექსის 353-ე პრიმა მუხლის მეორე ნაწილით აქვს წარდგენილი, რაც პოლიციელის ჯანმრთელობის ხელყოფას სამსახურებრივ საქმიანობასთან დაკავშირებით გულისხმობს.
სახელმწიფო ბრალდების განმარტებით, სხვიტარიძის ქმედების შედეგად სამართალდამცავმა ფიზიკური დაზიანება მიიღო, კერძოდ კი, მას თავი ჰქონდა გატეხილი.
აღნიშნული ქმედება სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.
