ზვიად გამსახურდია, რომელიც იყო ძალიან ცუდი პრეზიდენტი, მაგრამ ძალიან კარგი დისიდენტი, ასე არ მოიქცეოდა და ლუკაშენკოს საპრეზიდენტო არჩევნებში გამარჯვებას არ მიულოცავდა. განაცხადა რუსმა დისიდენტმა, ჟურნალისტმა, საზოგადო მოღვაწემ ვალერია ნოვოდვორსკაიამ პოლიტიკოს კონსტანტინე ბოროვოისთან გამართული ვიდეოდიალოგის დროს.
ვალერია ნოვოდვორსკაიას უკმაყოფილება გამოიწვია იმან, რომ საქართველოს პრეზიდენტმა მიხეილ სააკაშვილმა ბელორუსის პრეზიდენტს ალექსანდრე ლუკაშენკოს დაურეკა და საპრეზიდენტო არჩევნებში გამარჯვება მიულოცა.
"ჩემი აზრით დისიდენტის წოდება პრეზიდენტის წოდებაზე უფრო მაღალია. ღმერთმაც ქნას მიხეილ სააკაშვილმა მოუტანოს სარგებელი საქართველოს, მაგრამ მიმაჩნია, რომ ზვიად გამსახურდია, რომელიც იყო ძალიან ცუდი პრეზიდენტი, მაგრამ ძალიან კარგი დისიდენტი ასე არ მოიქცეოდა", _ განაცხადა ნოვოდვორსკაიამ.
ამაზე თავის მხრივ პოლიტიკოსმა კონსტანტინე ბოროვოიმ განაცხადა, რომ მისი აზრით მიხეილ სააკაშვილი სწორად იქცევა.
"არ მინდა, რომ მიხეილ სააკაშვილმა თავისი ცხოვრება ისე დაასრულოს, როგორც ზვიად გამსახურდიამ დაასრულა. სწორედ ამიტომაც მიმაჩნია, რომ იგი სწორად იქცევა", _ განაცხადა ბოროვოიმ.
