"ახალი რევოლუციის ადამიანები", _ასეთნაირად მოიხსენია "ქართული ლეგიონის" ხელმძღვანელმა, თადარიგის გენერალ-მაიორმა გიორგი ყარყარაშვილმა პარლამენტარები ნუგზარ წიკლაური და ვახტანგ ბალავაძე.
"წიკლაური და ბალავაძე არიან ახალი რევოლუციის ადამიანები. მხოლოდ ასეთ ადამიანებს შეეძლოთ, ვეტერანთათვის თანამერძოლთა სურათების წაბილწვა დაებრალებინათ", _ აღნიშნა ყარყარაშვილმა.
მისი თქმით, ყველა მოქალაქეს, ყველა ჟურნალისტს შერცხვება, თუ ერთი თვის შემდეგ ვეტერანებს ჯარიმის გადახდას კვლავაც მოსთხოვენ. მეტიც, ეს ქართული საზოგადოების სირცხვილი იქნება.
"ადამიანი, რომელსაც 20 ტყვია აქვს მოხვედრილი ან კიდევ ხანგრძლივი დროის განმავლობაში ტყეში იყო დაკარგული, არ შეიძლება თანამებრძოლთა შეურაცხყოფაში დაადანაშაულო", _ აღნიშნა ყარყარაშვილმა.
ცნობისთვის, "ქართული ლეგიონის" ხელმძღვანელი ვეტერანთა უფლებების დასაცავად მოძრაობას იწყებს და ამისთვის ყველა სამართლებრივი გზის _ აქციების, სასამართლოს გამოყენებას აპირებს. ამასთან, არც საზოგადოების დარაზმვას არ გამორიცხავს.
შეგახსენებთ, 2011 წლის 3 იანვარს ქართველმა სამართალდამცავებმა გმირთა მემორიალთან მიმდინარე ვეტერანთა მშვიდობიანი აქცია ძალის გამოყენებით დაშალეს.
