რატომ გადაწყვიტეთ, რომ რუსეთში უნდა ვიარო? სპეციალურად ავრცელებთ ცრუ ინფორმაციას, - ასე უპასუხა თბილისის საპატრულო პოლიციის ხელმძღვანელმა ვაჟა სირაძემ სანქციებთან დაკავშირებით დასმულ შეკითხვას: „სამმა ქვეყანამ დაგასანქცირათ და შეიძლება ვერც ერთ ევროპულ ქვეყანაში ვეღარ შეხვიდეთ, მზად ხართ მხოლოდ რუსეთში იაროთ?“
ვაჟა სირაძის განცხადებით, „აქ არავითარი რუსეთი“ არ არის, არამედ არიან პოლიციელები, რომელთა სიცოცხლეს და ჯანმრთელობას საფრთხე ექმნება.
„მინდა განვმარტო, რომ აქ არავითარი რუსეთი და არავითარი მსგავსი რამ არ არსებობს, აქ არიან პოლიციელები, რომელთა სიცოცხლეს და ჯანმრთელობას ექმნება საფრთხე. აქ არიან ადამიანები, აქ არის სტრატეგიული შენობა, რომელსაც ანგრევენ და ცეცხლს უკიდებენ. ამ ქვეყანაში არსებობს კანონი, არსებობს სახელმწიფო და ეს ქვეყანა იქნება წელში გამართული. ჩვენ ყოველთვის მივიღებთ შესაბამის ზომებს“, - განაცხადა ვაჟა სირაძემ.
ბალტიის ქვეყნებმა ბიძინა ივანიშვილი, ვახტანგ გომელაური, შალვა ბედოიძე, იოსებ ჭელიძე, ალექსანდრე დარახველიძე, გიორგი ბუთხუზი, ზვიად ხარაზიშვილი, მილერი ლაგაზაური, მირზა კეზევაძე, ვაჟა სირაძე და თეიმურაზ კუპატაძე დაასანქცირეს და მათ ესტონეთში, ლატვიასა და ლიეტუვაში შესვლა აუკრძალეს.
