"რუსთავის მედიის მართვის კომპანიის" დამფუძვნებელ ეროსი კიწმარიშვილი ტელეკომპანია "მაესტროს" წინაშე არსებულ დავალიანებას ეტაპობრივად დაფარავს.
ამის შესახებ "ჯი-ეიჩ-ენს" არხის ახალმა გენერალურმა დირექტორმა ბაჩო კიკაბიძემ განუცხადა.
მისივე განმარტებით, აღნიშნული შეთანხმება კიწმარიშვილთან მიმდინარე მოლაპარაკებების ფარგლებში იქნა მიღწეული.
"მოლაპარაკებები დასრულებულია. შევიმუშავეთ არხის კრიზისიდან გამოყვანის გეგმა, მათ შორის გაიწერა დავალიანების დაფარვის გრაფიკი, რაც ეტაპობრივად მოხდება", - განმარტა კიკაბიძემ.
ამასთან, "მაესტროს" გენერალური დირექტორის თქმით, ამ ეტაპზე, სანამ მხარეებს შორის ახალი შეთანხმება არსებობს, ტელეკომპანია "რუსთავის მედიის მართვის კომპანიის " შესაბამისი ხელშეკრულების გაწყვეტას არ აპირებს.
შეგახსენებთ იმას, რომ "მაესტროსა" და კიწმარიშვილს შორის დაპირისპირებაზე გასული წლის ბოლოს არხის უკვე ყოფილი გენერალური დირექტორი კახა ბექაური ალაპარაკდა. მისი განცხადებით, არხს ფინანსური პრობლემები აქვს, რაც სწორედ "რუსთავის მედიის მართვის კომპანიის" დამფუძნებლის ბრალია. ბექაური ამტკიცებდა, რომ კიწმარიშვილს "მაესტროს" საკუთარი პოლიტიკური ინტერესებისთვის გამოყენება სურდა. უკვე 31 დეკემბერს კი, არხის ხელმძღვანელობის სახელით მამუკა ღლონტმა განცხადება გაავრცელა, რომელშიც "მაესტრო" კიწმარიშვილს დავალიანების დასაფარად 10-დღიან ვადას აძლევდა, წინააღმდეგ შემთხვევაში "კანონით მინიჭებული ყველა სამართლებრივი ბერკეტის გამოყენებით" იმუქრებოდა. იანვრის დასაწყისში მხარეებს შორის მოლაპარაკება დაიწყო და ურთიერთობაც დათბა. უკვე ამ დროისთვის არხის ახალია გენერალური დირექტორი ბაჩო კიკაბიძე აცხადებდა, რომ "მაესტროსა" და კიწმარიშვილს შორის მოლაპარაკებებს ულტიმატუმების ფონი არ ჰქონდა.
