მონღოლეთის ხელისუფლებამ რუსეთის პრეზიდენტის ვლადიმირ პუტინის, საერთაშორისო სისხლის სამართლის სასამართლოს ორდერის საფუძველზე, დაკავებაზე უარი ახსნა ქვეყნის ენერგეტიკული დამოკიდებულებითა და ნეიტრალიტეტით. ამის შესახებ იტყობინება Politico ულან-ბატორში მთავრობის წარმომადგენელზე დაყრდნობით.
მისი თქმით, მონღოლეთს საჭირო ნავთობპროდუქტების 95 პროცენტი და ელექტროენერგიის 20 პროცენტზე მეტი მეზობელი ქვეყნებიდან შემოაქვს.
"ეს მარაგი გადამწყვეტია ჩვენი და ჩვენი ხალხის არსებობის უზრუნველსაყოფად," - განუცხადა ოფიციალურმა წარმომადგენელმა Politico-ს, "მონღოლეთი ყოველთვის ინარჩუნებს ნეიტრალიტეტის პოლიტიკას თავის დიპლომატიურ ურთიერთობებში."
პოლიტიკისა და სამართლის ექსპერტების აზრით, იმის გამო, რომ მონღოლეთმა არ აღასრულა სისხლის სამართლის საერთაშორისო სასამართლოს დაკავების ორდერი, იგი გარკვეული შედეგების წინაშე აღმოჩნდება.
პუტინის ულან-ბატორში ვიზიტის წინ, ევროკავშირმა, უკრაინამ და საერთაშორისო უფლებადამცველმა ორგანიზაციებმა, როგორიცაა Amnesty International და Human Rights Watch მოუწოდეს მონღოლეთს, მონღოლეთს რომის სტატუტით ნაკისრი ვალდებულებების შესრულებისკენ მოუწოდეს. თუმცა, როგორც Bloomberg-ი იტყობინებოდა, მონღოლეთმა დაარწმუნა პუტინი, რომ მას არავინ დააკავებდა.
პუტინი მონღოლეთს ეწვია ქვეყნის პრეზიდენტის უხნააგიინ ხურელსუხის მიწვევით, რათა მონაწილეობა მიეღო მდინარე ხალხინ გოლზე იაპონიის შეიარაღებულ ძალებზე საბჭოთა და მონღოლური ჯარების ერთობლივი გამარჯვების 85 წლისთავისადმი მიძღვნილ საზეიმო ღონისძიებებში.
ეს არის პუტინის პირველი ვიზიტი ქვეყანაში, რომელსაც რატიფიცირებული აქვს რომის სტატუტი, მას შემდეგ, რაც სასამართლომ მისი დაპატიმრების ორდერი გამოსცა 2023 წლის მარტში. მონღოლეთმა ხელი მოაწერა რომის სტატუტს 2000 წელს და რატიფიცირება მოახდინა 2002 წელს.
