ვენესუელის გენერალურმა პროკურორმა დაიწყო სისხლის სამართლის გამოძიება ოპოზიციის საპრეზიდენტო კანდიდატის ედმუნდო გონსალესისა და ოპოზიციური ალიანსის ლიდერის მარია კორინა მაჩადოს წინააღმდეგ.
გენერალური პროკურორის განცხადებით, გამოძიების წამოწყება უკავშირებდა ოპოზიციონერი პოლიტიკოსების მიერ გავრცელებულ ღია წერილს.
წერილში გონსალესი და მაჩადო მოუწოდებენ შეიარაღებულ ძალებს, უარი თქვან ვენესუელის პრეზიდენტის ნიკოლას მადუროს მხარდაჭერაზე და შეწყვიტონ დემონსტრანტების მიმართ რეპრესიები.
ამასთან, ოპოზიციონერი ლიდერები მოუწოდებენ შეიარაღებულ ძალებს, არ დაუშვან რეჟიმის მძვინვარების გაღვივება ხალხის წინააღმდეგ და პატივი სცენ 28 ივლისის საპრეზიდენტო არჩევნების შედეგებს.
"მადურომ მოახდინა სახელმწიფო გადატრიალება, რაც ეწინააღმდეგება კონსტიტუციურ წესრიგს და სურს, რომ თქვენ თავის თანამზრახველებად გაქციოთ", - წერენ ლიდერები.
გენერალური პროკურორის მტკიცებით, ოპოზიციონერმა პოლიტიკოსებმა საპრეზიდენტო არჩევნებში გამარჯვებულად გამოაცხადეს კანდიდატი და ამით შეეწინააღმდეგნენ ეროვნულ საარჩევნო საბჭოს, ერთადერთ ორგანოს, რომელსაც უფლება აქვს არჩევნებში გამარჯვებულის გამოცხადებისა. "ისინი ღიად უბიძგებდნენ პოლიციასა და სამხედრო მოსამსახურეებს, არ დაემორჩილონ კანონებს", - ამბობს პროკურორი.
"გონსალესის და მაჩადოს წერილობითი მიმართვა აჩვენებს სხვადასხვა დანაშაულის სავარაუდო ჩადენას, მათ შორის ფუნქციების უზურპაციას, ყალბი ინფორმაციის გავრცელებას შიშისა და შეთქმულების გამოწვევის მიზნით", - დასძინა მან.
ვენესუელაში საპრეზიდნეტო არჩევნები 28 ივლისს გაიმართა. საარჩევნო კომისიამ გამარჯვებულად ნიკოლას მადურო გამოაცხადა. საარჩევნო საბჭომ განაცხადა, რომ მადურომ, რომელიც მანამდე ქვეყანას ორი საპრეზიდენტო ვადით მართავდა, ამომრჩეველთა 51,2 პროცენტის მხარდაჭერა მიიღო. თუმცა, საერთაშორისო დამკვირვებლებს არჩევნებში მონაწილეობის უფლება არ მისცეს.
არჩევნების შემდეგ გონსალესის მხარდამჭერები ქუჩებში საპროტესტო აქციებზე გამოვიდნენ, რასაც მოჰყვა უშიშროების ძალების და შეიარაღებული პრო-სამთავრობო ჯგუფების მიერ მათი დარბევა.
ოპოზიციის მტკიცებით, ხმების სამართლიანი დათვლით გონსალესს არჩევნები დაახლოებით 67 პროცენტით უნდა მოეგო. ამ მტკიცების მხარდასაჭერად, მადუროს ოპონენტებმა გამოაქვეყნეს ვენესუელაში პირდაპირ საარჩევნო უბნებიდან მიღებული ოქმების 80 პროცენტზე მეტი. წინასაარჩევნო გამოკითხვებმა ასევე აჩვენა, რომ მადუროს დამარცხება გარდაუვალი იქნებოდა.
3 აგვისტოს მონაცემებით, საპროტესტო აქციების დროს 2000 ადამიანი დააკავეს, დაღუპულია 20-მდე ადამიანი.
