რუსული ნავთობის კომპანიებმა მიმდინარე წლის 1 იანვრიდან ბელორუსისათვის ნახშირწყალბადების მიწოდება შეწყვიტეს. ინფორმაციას ამის შესახებ "როიტერი" ბელორუსული "ბელნეფტხიმზე" დაყრდნობით ავრცელებს. "როიტერს" ინფორმაციას ასევე აწვდიან რუსულ კომპანიებში არსებული წყაროები.
მიწოდება შეწყვეტილია იმის გამო, რომ მხარეები ნავთობის ახალ ფასებზე ვერ შეთანხმდნენ. ბელორუსის გავლით ნახშირწყალბადების ტრანზიტზე მიწოდების შეწყვეტამ გავლენა არ იქონია.
ბელორუსში მიიჩნევენ, რომ მიწოდებები უკვე იანვარში განახლდება. ყოველ შემთხვევაში ბელორუსული ნავთობგადამამუშავებელი ქარხნები ნედლეულით სწორედ მიმდინარე თვის ბოლომდე არიან უზრუნველყოფილნი.
გაზეთ "ვედომოსტის" ინფორმაციით, რუსული კომპანიები ბელორუსისათვის ნავთობის ფასის გაზრდას მოითხოვენ - ტონაზე 45 აშშ დოლარით. ასეთი მოთხოვნა მას შემდეგ გაჩნდა, რაც 1 თებერვლიდან მინსკმა ნავთობის ტრანზიტზე გადასახადი 12,5 % გაზარდა. მინსკში ფასების გაზრდას არ თანხმდებიან - ადგილობრივი ჩინოვნიკები აცხადებენ, რომ ახალი ტარიფი რუსეთთანაა შეთანხმებული.
რუსული ნავთობის ბელორუსში უმსხვილესი მიმწოდებლები არიან - "ლუკოილი", "სურგუტნეფტგაზი" და "როსნეფტი". ამ კომპანიებში მიწოდების შეწყვეტის შესახებ კომენტარს ჯერ არ აკეთებენ. "ტრანსნეფტში" აღნიშნავენ, რომ მზად არიან ნავთობის გადასაქაჩავად მილი გამოყონ, თუმცა მხარეთა შორის მოლაპარაკებებში არ მონაწილეობენ.
2010 წლამდე რუსეთი ბელორუსში ნავთობის მიწოდებაში მონოპოლისტი იყო, თუმცა შემდეგ იძულებული იყო თავისი ადგილის ნაწილი ვენესუელისათვის დაეთმო. 2010 წლის ბოლოს მხარეებმა მოილაპარაკეს, რომ რუსეთი ბელორუსს ნავთობს გადასახადის გარეშე მიაწვდის. სანაცვლოდ მინსკმა პირობა დადო, რომ რუსეთის ბიუჯეტს რუსული ნედლეულის ნავთობპროდუქტების ექსპორტიდან მიღებულ ყველა გადასახადს მისცემს. რუსეთში დათვალეს, რომ ამგვარი გაცვლისაგან წელიწადში 5,3 მილიარდ აშშ დოლარს დაკარგავენ, ხოლო ბელორუსის დახმარება 3,9 მილიარდი აშშ დოლარი იქნება.