აშშ-ს სენატის საგარეო ურთიერთობათა კომიტეტის თავმჯდომარე, ბენ კარდინი ევროკავშირისა და 14 ევროპული ქვეყნის საგარეო კომიტეტების თავმჯდომარეებთან ერთად, რუსული კანონის შესახებ ერთობლივ განცხადებას აქვეყნებს.
„დღეს სენატის საგარეო ურთიერთობების კომიტეტის თავმჯდომარე, სენატორი ბენ კარდინი ხელმძღვანელობდა ბელგიის, ჩეხეთის რესპუბლიკის, ესტონეთის, ფინეთის, გერმანიის, ისლანდიის, ირლანდიის, იტალიის, ევროკავშირის, ლატვიის, ლიეტუვის, ნორვეგიის, პოლონეთის, უკრაინის და გაერთიანებული სამეფოს პარლამენტის საგარეო ურთიერთობების კომიტეტების თავმჯდომარეებთან შეხვედრას, რომელთაც გაავრცელეს განცხადება საქართველოს პარლამენტის მიერ რუსული სტილის უცხოური აგენტის კანონის მიღების შესახებ, რომელიც ორგანიზაციებისგან, რომლებიც საერთაშორისო დაფინანსების 20%-ზე მეტს იღებენ, მოითხოვს დარეგისტრირდნენ როგორც უცხოური ძალის ინტერესების გამტარ ორგანიზაციებად.
მეგობრებისა და პარტნიორების მხრიდან გამოთქმული არაერთი შეშფოთების მიუხედავად, საქართველოს პარლამენტმა გადადგა საგანგაშო და რეპრესიული ნაბიჯი, რომელიც ძირს უთხრის დემოკრატიას და ეწინააღმდეგება დასავლეთთან ინტეგრაციის მიზანს. როგორც ევროატლანტიკური კანონმდებლებს, ჩვენ გვესმის, რომ პარლამენტის როლი არის ხალხის ნების აღსრულება და ქართველებმა ცალსახად უარყვეს კრემლის მიერ შთაგონებული კანონი, როგორც მათ იდენტობასთან, ევროპულ ღირებულებებსა და დემოკრატიის პრინციპებთან შეუთავსებელი. მარტივად რომ ვთქვათ, ე.წ. უცხოური აგენტის კანონი ასახავს ვლადიმირ პუტინის პოლიტიკას, რომელიც აგრძელებს არაკანონიერად საქართველოს ტერიტორიების 20%-ის ოკუპაციას.
პატივსაცემი ქართული ორგანიზაციები, როგორებიც არიან – „საერთაშორისო გამჭვირვალობა – საქართველო“ (TI Georgia), „სამართლიანი არჩევნებისა და დემოკრატიის საერთაშორისო საზოგადოება“ (ISFED) და „ახალგაზრდა იურისტთა ასოციაცია“ (GYLA) ძალიან მნიშვნელოვან როლს თამაშობენ საქართველოს ევროატლანტიკური ინტეგრაციის გზაზე. ეს კანონი არის გამოწვევა ასეთ ღირსეულ ძალისხმევისთვის და ემსახურება პირდაპირ თავდასხმას სამოქალაქო საზოგადოებასა და დამოუკიდებელ მედიაზე, რომლებიც ნებისმიერი დემოკრატიის ფუნდამენტურ ელემენტს წარმოადგენენ. ამერიკის შეერთებული შტატები და ევროპა გააგრძელებს მათ მხარდაჭერას, რადგან მათი ხელმძღვანელობა და საქართველოს ხედვა ასახავს ნამდვილ პატრიოტიზმს, განსხვავებით პარლამენტის 84 წევრისა, რომლებმაც საკუთარი თავი გუშინდელ კენჭისყრაზე რუსეთს შეუერთეს.
ჩვენ არასდროს მივატოვებთ ქართველ ხალხს, რომლებმაც მშვიდობიანი წინააღმდეგობით გაბედულად გამოავლინეს თავისი მტკიცე ერთგულება დემოკრატიული ღირებულებების მიმართ. ასევე არ ვიყოყმანებთ, პასუხი დავაკისროთ იმ პირებს, რომლებიც პასუხს აგებენ ამ რუსული სტილის კანონის მიღებასა და არაძალადობრივ დემონსტრანტების მიზანში ამოღებაში, მათ შორის ბიძინა ივანიშვილსა და მის წრეზე. ქართველ ხალხს კი ვუცხადებთ, რომ თქვენ მარტო არ ხართ“, – აღნიშნულია განცხადებაში.