სოსო ბერიკაშვილის საქციელი სამარცხვინოა, ყველაზე ზარმაცი თანამშრომელი იყო - წერს სოციალურ ქსელში კავკასიის უნივერსიტეტის რექტორი კახა შენგელია ამავე უნივერსიტეტის ეკონომიკის სკოლის უკვე ყოფილი დეკანის, სოსო ბერიკაშვილის გათავისუფლებასთან დაკავშირებით.
"ჩემო ძვირფასო სტუდენტებო, ლექტორებო, პროფესორებო, მასწავლებლებო, ჩემო საყვარელო თანამშრომლებო, რაც სოსო ბერიკაშვილმა დღეს იკადრა, არის ღალატი ყველაფრის, სტუდენტების, უნივერსიტეტის, მისი ოჯახის, რასაც თვითონ აკეთებდა ბოლო რამდენიმე წლის განმავლობაში.
მისი საქციელი არის სამარცხვინო, რადგან ამ ძალიან დაძაბულ სიტუაციას ქვეყანაში იყენებს თავისი პოლიტიკური კარიერისთვის.
საჯაროდ ვაცხადებ, არანაირი ზარი, მუქარა, თხოვნა არ ყოფილა მისი სამსახურიდან გაშვების გამო. ის იყო ყველაზე სუსტი დეკანი კავკასიის უნივერსიტეტში და ყველაზე ზარმაცი თანამშრომელი.
ძალიან დიდი ხნის განმავლობაში, მასთან მქონდა რთული ურთიერთობა მხოლოდ და მხოლოდ უნივერსიტეტის გამო, ბოლოსდაბოლოს იძულებული გავხდი სამსახურიდან გამეშვა, სამწუხაროდ დაემთხვა იმ დროს, რაც მან შესანიშნავად გამოიყენა", - წერს შენგელია.
შეგახსენებთ, სოსო ბერიკაშვილმა სოციალურ ქსელში დაწერა, რომ კავკასიის უნივერსიტეტის რექტორმა სუს-ის მოთხოვნით გაათავისუფლა.
