რესპუბლიკელმა სენატორმა ქეთი ბრიტმა გააკრიტიკა პრეზიდენტ ჯო ბაიდენის კონგრესში გამოსვლა და თქვა, რომ ბაიდენის ხელმძღვანელობით აშშ-ს აქვს ნაკლები შესაძლებლობები, ნაკლები თავისუფლება, ქვეყანა კი "ხელიდან გვეცლება".
„სწორედ ახლა, ამერიკული ოცნება მრავალი ოჯახისთვის ღამის კოშმარად გადაიქცა. ჩვენი სახელმწიფოს ჭეშმარიტი, შეუალამაზებელი მდგომარეობა იწყება და მთავრდება ამით – ჩვენი ოჯახები იტანჯებიან. ჩვენს ქვეყანას მეტის გაკეთება შეუძლია“, – განაცხადა სენატორმა
ბრიტის თქმით, ბაიდენმა მემკვიდრეობით მიიღო ისტორიაში ყველაზე უსაფრთხო საზღვარი. თუმცა, თანამდებობის დაკავებიდან რამდენიმე წუთში მან შეაჩერა ყველა დეპორტაცია, შეაჩერა სასაზღვრო კედლის მშენებლობა და გამოაცხადა მილიონობით ადამიანის ამნისტიის მინიჭების გეგმა. მისი თქმით, პრეზიდენტმა სასაზღვრო კრიზისი თავის პირველ 100 დღეში 94 აღმასრულებელი ბრძანებით გამოიწვია.
სენატორის თქმით, პრეზიდენტ ბაიდენის სასაზღვრო კრიზისი სირცხვილია, ის ამაზრზენია და შესაძლებელი იყო, მისი თავიდან აცილება.
„პრეზიდენტ ბაიდენს უბრალოდ ეს არ ესმის. მისი ადმინისტრაციის პირობებში, ოჯახების მდგომარეობა უარესდება, ჩვენი დასახლებები ნაკლებად უსაფრთხოა და ჩვენი ქვეყანა ნაკლებად დაცული. მე უბრალოდ მსურს, მან იცოდეს, რას განიცდიან ნამდვილი ოჯახები სამზარეულოს მაგიდებთან, როგორიც ჩემი მაგიდაა. ეს ის ადგილია, სადაც ჩემს ოჯახს მძიმე საუბრები აქვს. ეს არის ადგილი, სადაც ჩვენ რთულ გადაწყვეტილებებს ვიღებთ, სადაც ერთმანეთს ვუზიარებთ ჩვენს კარგ, ცუდ და საშინელ დღეებს, სადაც ერთად ვიცინით, სადაც ერთმანეთს ხელს ვკიდებთ და ვლოცულობთ. და ამაღამ, ამერიკულ ოჯახში უნდა იყოს მძიმე საუბარი, რადგან სიმართლე იმაში მდგომარეობს, რომ ჩვენ ყველა ვდარდობთ ერის მომავალზე. ქვეყანა, რომელსაც ჩვენ ვიცნობთ და გვიყვარს, ხელიდან გვეცლება. შეგრძნება, თითქოს მომავალ თაობას ექნება ნაკლები შესაძლებლობები, ნაკლები თავისუფლება, ვიდრე ჩვენ გვქონდა. ვშიშობ, ჩემს საკუთარ შვილებს არ ექნებათ შანსი, განახორციელონ თავიანთი ამერიკული ოცნება“, – განაცხადა ბრიტმა.