ჩემი პირველი საგარეო ვიზიტი ბრიუსელში, როგორც საქართველოს ახალი პრემიერ-მინისტრის, კიდევ ერთი ნათელი დემონსტრირებაა იმისა, რომ ჩვენ განსაკუთრებულ მნიშვნელობას ვანიჭებთ ნატო-სთან პარტნიორობას, – ამის შესახებ საქართველოს პრემიერ-მინისტრმა, ირაკლი კობახიძემ ბრიუსელში, ნატო-ს გენერალურ მდივან იენს სტოლტენბერგთან ერთობლივ ბრიფინგზე განაცხადა.
„ბატონო გენერალურო მდივანო, დიდი მადლობა ნატო-ს ოფისში ჩემი მასპინძლობისთვის. ჩემთვის დიდი პატივია თქვენთან და ალიანსთან საუბარი ნატო-საქართველოს პარტნიორობის არსებითი დღის წესრიგის დინამიკაზე და ჩვენი ინტეგრაციის პროცესზე. ნება მიბოძეთ, გამოვიყენო ეს შესაძლებლობა და გამოვხატო ჩემი გულწრფელი მადლიერება ნატო-ს მიმართ მისი მტკიცე და მუდმივი მხარდაჭერისთვის საქართველოს სუვერენიტეტის და ტერიტორიული მთლიანობის მიმართ. საქართველო არის ნატო-ს ყველაზე ახლო და თავსებადი პარტნიორი. ჩემი პირველი საგარეო ვიზიტი ბრიუსელში, როგორც საქართველოს ახალი პრემიერ-მინისტრის, კიდევ ერთი ნათელი დემონსტრირებაა იმისა, რომ ჩვენ განსაკუთრებულ მნიშვნელობას ვანიჭებთ ამ პარტნიორობას“, – განაცხადა ირაკლი კობახიძემ.
მისივე თქმით, წლების განმავლობაში, საქართველომ მნიშვნელოვანი წვლილი შეიტანა საერთო ევროატლანტიკურ უსაფრთხოებაში ნატო-ს მისიებში და ოპერაციებში მონაწილეობით.
„წლების განმავლობაში, ჩვენ მნიშვნელოვანი წვლილი შევიტანეთ საერთო ევროატლანტიკურ უსაფრთხოებაში ნატო-ს მისიებში და ოპერაციებში მონაწილეობით. მან მნიშვნელოვანი როლი ითამაშა საქართველოს თავდაცვისუნარიანობის გაძლიერებაში და მოკავშირეებთან ჩვენი თავსებადობის გაზრდაში. ჩვენი მხრივ არ დაგვიშურებია ძალისხმევა, დავდგეთ ჩრდილოატლანტიკური ხელშეკრულების ღირებულებებზე, განვახორციელოთ ყოვლისმომცველი რეფორმების დღის წესრიგი და წინ წავწიოთ ჩვენი ინტეგრაციის პროცესი, მიუხედავად შიდა და გარე უსაფრთხოების გამოწვევებისა. ჩვენ ამჟამად გვაქვს შემაშფოთებელი პერიოდები ევროპის უსაფრთხოებისთვის. წესებზე დაფუძნებული საერთაშორისო წესრიგი სერიოზული გამოწვევების წინაშე დგას, რადგან ევროპაში თავისუფლებისა და მშვიდობის პრინციპი საფრთხეშია. საქართველოს ტერიტორიების 20 პროცენტი ოკუპირებულია. ამ რთულ დროს მოკავშირეებმა და საერთაშორისო საზოგადოებამ უნდა გააგრძელონ უპრეცედენტო ერთიანობის, წესებზე დამყარებული მსოფლიო წესრიგისა და საერთაშორისო სამართლის პრინციპებისადმი მტკიცე ერთგულების დემონსტრირება. ნება მომეცით, კიდევ ერთხელ გავიმეორო ჩვენი მტკიცე ერთგულება ნატო-საქართველოს პარტნიორობის მიმართ და გამოვხატო მადლობა თქვენი მხარდაჭერისთვის“, – განაცხადა ირაკლი კობახიძემ.
