ამერიკელ ჟურნალისტ ტაკერ კარლსონთან, რუსეთის პრეზიდენტის ვლადიმირ პუტინის ინტერვიუს შემდეგ, რომელშიც მან უკრაინაში შეჭრას „ისტორიულად გამართლებული” უწოდა, მონღოლეთის ყოფილმა პრეზიდენტმა ცახიაგიინ ელბეგდორჯმა გამოაქვეყნა მონღოლთა იმპერიის რამდენიმე „რუკა“.
მედიის ცნობით, ერთ-ერთ „რუკაზე“, რომელიც XIII საუკუნით თარიღდება, ასახულია ჩინგიზ ხანისა და მისი მემკვიდრეების მიერ დაპყრობილი ოცამდე თანამედროვე სახელმწიფოს ტერიტორია. მათ შორის რუსეთი, ბელარუსი, უკრაინა, თურქეთი, საქართველო, სომხეთი, აზერბაიჯანი, ირანი, ავღანეთი, ყაზახეთი, ყირგიზეთი, თურქმენეთი, ტაჯიკეთი, პაკისტანი, ჩინეთი, კორეა და ინდოეთი. სხვა „რუკაზე“ მითითებულია 1471 წელი და რუსეთი აღნიშნულია, როგორც პატარა ადგილი მონღოლთა უზარმაზარ იმპერიაში.
ელბეგდორჯმა მიანიშნა, რომ პუტინის ლოგიკით, თანამედროვე რუსეთი ჩინგიზ ხანის შთამომავლებს უნდა ეკუთვნოდეთ. ”მე ვიპოვე მონღოლეთის ისტორიული რუკა. არ ინერვიულო. ჩვენ ვართ მშვიდობიანი და თავისუფალი ერი“, - წერს ის.
მონღოლეთის ექსპრეზიდენტს მხარი ჩინური წარმოშობის ამერიკელმა მსახიობმა რობერტ ვუმ დაუჭირა. „ისტორიის მიხედვით, რუსეთმა უნდა დააბრუნოს ვლადივოსტოკი და უზარმაზარი ტერიტორია, რომელიც 100 წელზე მეტი ხნის წინ ჩვენ [ჩინეთს] მოგვპარა - თქვა მან.
ამერიკელ ჟურნალისტთან ინტერვიუში პუტინმა დნიპროს მარცხენა სანაპიროს, მათ შორის კიევს, "ისტორიული რუსული მიწები" უწოდა. მან ასევე განაცხადა, რომ უკრაინა არის სავარაუდოდ „ხელოვნური სახელმწიფო“, რომელიც შეიქმნა „სტალინის სურვილით“.