რუსეთი აპირებს საქართველოსთან კავშირების გაუმჯობესებას, თუნდაც დიპლომატიური ურთიერთობების არარსებობის პირობებში - ამის შესახებ TASS-თან ინტერვიუში რუსეთის საგარეო საქმეთა მინისტრის მოადგილემ მიხეილ გალუზინმა განაცხადა.
"რაც შეეხება თბილისთან დიპლომატიური ურთიერთობებს, როგორც ვიცით, ისინი 2008 წელს გაწყდა [მიხეილ] სააკაშვილის რეჟიმის ინიციატივით. სამწუხაროდ, მათი აღდგენის შესაძლებლობა ექვემდებარება პოლიტიკურ მოთხოვნებს, რომლებიც ეწინააღმდეგება რეგიონის ახალ რეალობას. ჩვენი მხრივ, დიპლომატიური ურთიერთობების არარსებობის მიუხედავად, ვაპირებთ გავაგრძელოთ საქართველოსთან ურთიერთობების ნორმალიზაციის ხელშეწყობა", - თქვა გალუზინმა.
მედიის ინფორმაციით, გალუზინმა ყურადღება გაამახვილა რუსეთსა და საქართველოს შორის სავაჭრო-ეკონომიკური ურთიერთქმედების პოზიტიურ დინამიკაზე.
"საქართველოს ხელისუფლების პრაგმატული ხაზის წყალობით, ჩვენს ქვეყნებს შორის ურთიერთობებში რთული პერიოდი, რომელიც გამოწვეული იყო 2019 წელს ქართველი რადიკალების ცნობილი პროვოკაციით, დაძლეულია. გასულ წელს გაუქმდა საქართველოს მოქალაქეების რუსეთში მოკლევადიანი მოგზაურობის სავიზო რეჟიმი, რომელიც 2000 წლიდან მოქმედებდა და აღდგა პირდაპირი ფრენები", - განაცხადა მან.
გალუზინის თქმით, ეს ნაბიჯები დადებითად მიიღო მთავრობამ და საქართველოს მოსახლეობის აბსოლუტურმა უმრავლესობამ.
"რუსეთის პრეზიდენტის 2023 წლის 10 მაისის შესაბამისი ბრძანებულებების შესრულებამ ხელი შეუწყო ჩვენს ხალხებს შორის კომუნიკაციის პირობებს, ხელი შეუწყო ბიზნეს წრეებს შორის კონტაქტების გაძლიერებას და სავაჭრო-ეკონომიკური კავშირების განვითარებას. გასულ წელს საქართველოს 1,4 მილიონზე მეტი სტუმარი ეწვია რუსეთიდან. რუსები უზრუნველყოფენ საქართველოს ეკონომიკის ტურისტული სექტორის შემოსავლის მეოთხედს. რუსეთის სავაჭრო-სამრეწველო პალატაში შეიქმნა რუსულ-ქართული ბიზნეს საბჭო და მისი ხუთი სხდომა უკვე გაიმართა", - კმაყოფილებით აღნიშნა გალუზინმა.
გალუზინის თქმით, პირდაპირი ფრენების სიხშირე და გეოგრაფია კვლავ იზრდება, ორი რუსული და ერთი ქართული ავიაკომპანია ახორციელებს კვირაში სულ 60-ზე მეტ რეისს რუსეთისა და საქართველოს ქალაქებს შორის.
