რუსეთის ატომური ენერგიის სააგენტო ("როსატომი") უახლოეს მომავალში, დიდი ალბათობით, დაკარგავს ერთ-ერთ უდიდეს საექსპორტო ბაზარს - წელიწადში 1 მილიარდ დოლარამდე - რუსულ ურანზე შეერთებული შტატების ემბარგოს შედეგად.
რუსულ ურანზე ემბარგოს დაწესებას გასული წლის დეკემბერში კონგრესმა მხარი დაუჭირა.
როგორც იუწყებიან, ემბარგოს ემხრობა აშშ-ის ბირთვული ენერგიის ინსტიტუტი და სექტორის პროფესიული ასოციაციები. მოელიან, რომ ემბარგო 2024 წელს დაწესდება.
ექსპერტების რწმენით, რადგან აშშ-ის ბირთვული ენერგიის ინსტიტუტი მხარს უჭერს ემბარგოს, გამოდის, ამერიკულ ატომურ ელექტროსადგურებს ურანის მარაგებთან დაკავშირებით არავითარი საფრთხე არ ემუქრებათ.
ბოლო ორი წელია, დასავლური ოპერატორები აქტიურად აგროვებენ ურანის მარაგებს, ხოლო კომპანიები, როგორიცაა Urenco, French Orano და America’s Centrus ავითარებენ მიწოდების ქსელებს და ზრდიან წარმოების შესაძლებლობებს.
კორპორაციებს მთავრობებმაც გამოუცხადეს მხარდაჭერა. დეკემბერში შეერთებულმა შტატებმა, იაპონიამ, დიდმა ბრიტანეთმა, საფრანგეთმა და კანადამ 4.2 მილიარდი დოლარი გამოყო გამდიდრებული ურანის მიმწოდებელთა მხარდასაჭერად.
მსოფლიო ბირთვული ასოციაციის მონაცემებით, 2021 წელს დასავლეთის ურანის კონვერტაციის სიმძლავრეები მუშაობდა 40%-იანი დატვირთვის, ხოლო 2026 წლისთვის მოსალოდნელია 90%-მდე გაზრდა.
Financial Times-ის ინფორმაციით, Urenco აწარმოებს მოლაპარაკებებს აშშ-სა და დიდი ბრიტანეთის ხელისუფლებასთან, ინვესტიციები განახორციელები მაღალი ხარისხის დაბალგამდიდრებული ურანის (HALEU) წარმოებაში. ლონდონმა უკვე გამოყო 9.5 მლნ ფუნტი (300-მილიონიანი ინვესტიციის ნაწილი), რათა „პუტინი გაიყვანოს გლობალური ენერგეტიკული ბაზრიდან და დაასრულოს რუსეთის დომინირება, როგორც HALEU-ს ერთადერთი კომერციული მწარმოებელი“.
მაღალი ხარისხის დაბალგამდიდრებული ურანის (HALEU) გამოიყენება მცირე ზომის ატომურ ელექტროსადგურებში.