ალასკაში ეპიდემიოლოგებმა ენდემური ყვავილით გამოწვეული სიკვდილის პირველი შემთხვევა დააფიქსირეს. მანამდე 2015 წლის შემდეგ ეპიდემიოლოგებმა ინფექცია შვიდჯერ გამოავლინეს.
ალასკის ჯანდაცვის დეპარტამენტის განცხადებით, ასაკოვანი კაცი კენაის ნახევარკუნძულიდან გარდაიცვალა დასუსტებული იმუნური სისტემის გამო, მანამდე ის სიმსივნეზე მკურნალობდა.
ეპიდემიოლოგებმა განაცხადეს, რომ ალასკის ყვავილის ვირუსი (Alaskapox) გავრცელებულია მღრღნელებში. ადგილობრივ მცხოვრებს ვირუსი მას შემდეგ გადაედო, რაც ის მიუსაფარმა კატამ დაკაწრა, რომელიც პატარა ძუძუმწოვრებზე ნადირობდა.
„მიუხედავად ანტიბიოტიკებით მკურნალობისა, პაციენტი გრძნობდა დაღლილობას და ასევე განიცდიდა შებოჭილობას და ტკივილს მარჯვენა იღლიასა და მხარში“, - აცხადებენ ექიმები.
მათ აღნიშნეს, რომ კაცი შემოდგომაზე საავადმყოფოში გადაიყვანეს. თავდაპირველი დადებითი დინამიკის მიუხედავად, ის მიმდინარე წლის იანვარში გარდაიცვალა.
ექსპერტების აზრით, კაცის კანზე დაზიანებები, რომელიც გამოწვეული იყო გამონაყარისგან, კარგად არ შეხორცდა, მას ასევე ჰქონდა სუნთქვის უკმარისობა.
ისინი ვარაუდობენ, რომ კაცი მხარზე გაკაწვრის შედეგად დაინფიცირდა, მიუხედავად იმისა, რომ მოგვიანებით კატისთვის ჩატარებულმა ტესტებმა ინფექციის ნიშნები არ გამოავლინა. ცხოველის კლანჭები, სავარაუდოდ, ფომიტის - დაბინძურებული ზედაპირის როლს ასრულებდა.
ალასკის ყვავილის ვირუსი პირველად 2015 წელს აღმოაჩნდა ქალს, რომელიც ფერბანქსის გარეუბანში ცხოვრობდა. სპეციალისტების თქმით, ეს ვირუსი არის ყვავილის, მაიმუნის ყვავილისა და ძროხის ყვავილის ნათესავი.
ეპიდემიოლოგებმა ხაზგასმით აღნიშნეს, რომ ინფექციამ, რამაც გამოიწვია სიკვდილი კენაეში, აჩვენა, რომ ვირუსის გეოგრაფიული გავრცელება ალასკაზე უფრო ფართოა, ვიდრე ადრე ფიქრობდნენ, რაც მოითხოვს ექიმების გაზრდილ ყურადღებას მთელს შტატში.
გამოცემა Anchorage Daily News აღნიშნავს, რომ ალასკის ყვავილის წინა შემთხვევები მხოლოდ გამონაყარითა და გადიდებული ლიმფური კვანძებით ხასიათდებოდა.
ექიმები მოქალქეებს ურჩევენ კანზე დაზიანებული ადგილები პლასტირებით დაიფარონ და და მიმართონ სამედიცინო დაწესებულებებს. ასევე დაიცვან ჰიგიენა.
