ისრაელის პრემიერ-მინისტრმა ბენიამინ ნეთანიაჰუმ მშვიდობის დამყარებისთვის სამი წინაპირობა დაასახელა. ამის შესახებ ის Wall Street Journal-ში გამოქვეყნებულ სტატიაში საუბრობს.

მისი თქმით, ეს სამი წინაპირობაა - „ჰამასის“ განადგურება, ღაზის დემილიტარიზაცია და პალესტინის საზოგადოების დერადიკალიზაცია.

როგორც ისრაელის მედია აღნიშნავს, სტატიაში არაფერია ნათქვამი მძევლებზე, რომლებიც ჯერ კიდევ ღაზაში ტერორისტების ხელში იმყოფებიან, მათი დაბრუნება კი ნეთანიაჰუს აუცილებელ პირობებს შორის არ დაუსახელებია.

„აშშ, დიდი ბრიტანეთი, საფრანგეთი, გერმანია და ბევრი სხვა ქვეყანა მხარს უჭერს ისრაელის განზრახვას გაანადგუროს ტერორისტული დაჯგუფება.

ამ მიზნის მისაღწევად, მისი {ჰამასის} სამხედრო პოტენციალი უნდა განადგურდეს და ღაზაში მისი პოლიტიკური მმართველობა უნდა დასრულდეს“, - წერს ნეთანიაჰუ.

ამასთან, მისი აზრით, ისრაელს უნდა ჰქონდეს გარანტიები, რომ ღაზა აღარასდროს იქნება გამოყენებული ისრაელზე თავდასხმის ბაზად.

„სხვა საკითხებთან ერთად, ეს მოითხოვს ღაზის პერიმეტრზე დროებითი უსაფრთხოების ზონისა და ღაზასა და ეგვიპტის საზღვარზე ინსპექტირების მექანიზმის შექმნას, რომელიც დააკმაყოფილებს ისრაელის უსაფრთხოების საჭიროებებს და აღკვეთს იარაღის კონტრაბანდას ტერიტორიაზე“, - წერს ნეთანიაჰუ.

მოსაზრებების ფონზე, რომ ომის შემდეგ ღაზა პალესტინის ხელისუფლებამ უნდა მართოს, ნეთანიაჰუმ თქვა, რომ „პალესტინის ხელისუფლებისგან ღაზის დემილიტარიზაციის მოლოდინი აუხდენელი ოცნებაა.

ის პალესტინის ხელისუფლებას ადანაშაულებს იუდეასა და სამარიაში ტერორიზმის დაფინანსებაში. ასევე ამბობს, რომ პალესტინის ხელისუფლება პალესტინელ ბავშვებს ასწავლის მიზნად დაისახონ ისრაელის განადგურება.

ასევე, მისი თქმით, სკოლებმა უნდა ასწავლონ ბავშვებს სიცოცხლისა და არა სიკვდილის დაფასება, სულიერმა მოძღვრებმა კი უნდა შეწყვიტონ ებრაელთა მკვლელობის ქადაგება.

„პალესტინის სამოქალაქო საზოგადოება უნდა გარდაიქმნას ისე, რომ ხალხმა მხარი დაუჭიროს ტერორიზმის წინააღმდეგ ბრძოლას და არა მის დაფინანსებას“, -წერს ნეთანიაჰუ.

"ამას, სავარაუდოდ, გაბედული და მორალური ლიდერობა დასჭირდება", - ამბობს ნეთანიაჰუ და აკრიტიკებს პალესტინის ლიდერს მაჰმუდ აბასს, რომელიც არც კი ცდილობს 7 ოქტომბერს ჩადენილი სისასტიკის დაგმობას.

ისრაელის პრემიერ-მინისტრი მიუთითებს წარმატებულ დერადიკალიზაციაზე, რომელიც მოხდა გერმანიასა და იაპონიაში მეორე მსოფლიო ომში მოკავშირეთა გამარჯვების შემდეგ და ამბობს, რომ „დღეს ორივე ქვეყანა შეერთებული შტატების მთავარი მოკავშირეა და ხელს უწყობს ევროპასა და აზიაში მშვიდობას, სტაბილურობასა და კეთილდღეობას. ის დასძენს, რომ 11 სექტემბრის შემდეგ, სპარსეთის ყურის არაბი შორსმჭვრეტელი ლიდერები ხელმძღვანელობდნენ თავიანთი საზოგადოებების დერადიკალიზებისა და ქვეყნების ტრანსფორმაციის ძალისხმევას.

„როდესაც „ჰამასი“ განადგურდება, მოხდება ღაზის დემილიტარიზაცია და პალესტინის საზოგადოება დაიწყებს დერადიკალიზაციის პროცესს, შესაძლებელი გახდება ღაზის აღდგენა და ახლო აღმოსავლეთში უფრო ფართო მშვიდობის პერსპექტივები რეალობად იქცევა“, - აცხადებს ნეთანიაჰუ.