მთავრობის სხდომა რომ ტარდება უნდა გვესმოდეს, რომ ბანკის „ქართუს“, ბიძინა ივანიშვილის თანამშრომლები იკრიბებიან ბიძინა ივანიშვილის საკეთილდღეოდ, ქვეყანას მართავენ იმის მიხედვით, თუ რა სიკეთეს მიიღებს ივანიშვილი, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა ირაკლი ღარიბაშვილის მთავრობის მუშაობის 2023 წლის ანგარიშზე საუბრისას განაცხადა.
მისი თქმით, "ქართული ოცნების" მატარებელმა უკვე ჩაიარა და დაწყებულ საქმეს, 2024 წელს ქართველი ხალხი ბოლომდე მიიყვანს.
„რუსული რიტორიკა, რუსული დეზინფორმაცია, რუსული პროპაგანდა, როცა ისინი ლაპარაკობენ ომთან დაკავშირებით და ქართველ ხალხს ეს უკვე ძალიან კარგად აქვს გააზრებული და ანალიზიც გაკეთებული აქვს. როცა პუტინს გადაწყვეტილი აქვს კონკრეტული ტერორისტული მოქმედებების ჩატარება, ცხადია ამას წინ ვერ აღუდგება ვერავინ. იგივე, რაც ხდება დღეს უკრაინასთან მიმართებაში და როგორ იქცევა ჰააგაში გასამართლებული ოფიციალური მკვლელის სტატუსით რუსეთის დღევანდელი მოქმედი პრეზიდენტი. რაც შეეხება რუსული პარტიის გაგრძელება ღარიბაშვილს საქართველოში და მის ბატონ ივანიშვილს, დეოლიგარქიზაციაზე როცა ვსაუბრობთ, კარგად უნდა გვესმოდეს, რომ ბანკი „ქართუს“ თანამშრომელი იყო პრემიერ- მინისტრი ღარიბაშვილი, ბანკი „ქართუს“ თანამშრომელი იყო თავდაცვის მინისტრი ჯუანშერი, ბანკი „ქართუს“ თანამშრომელი და პლასტიკური ბარათების დამამზადებელი იყო რეგიონული განვითარების და ინფრასტრუქტურის მინისტრი, ბანკი „ქართუს“ თანამშრომელი იყო სუს-ის უფროსი, მისი დაცვის წევრი იყო შს მინისტრი და ზოგადად ყველა იყო ბანკი „ქართუს“, ბიძინა ივანიშვილის თანამშრომელი. ისინი ასე უყურებენ, რომ შპს არის საქართველო, რომ კორპორაციაა და მთავრობის სხდომა რომ ტარდება უნდა გვესმოდეს, რომ ბანკი „ქართუს“, ბიძინა ივანიშვილის თანამშრომლები იკრიბებიან ბიძინა ივანიშვილის საკეთილდღეოდ, ანუ ბიძინა რა სიკეთეს მიიღებს ისე მართავენ ქვეყანას და დღეს, როცა ლაპარაკობენ კანდიდატის სტატუსზე და ივანიშვილის დამსახურებებზე, ესეც შევახსენთ მოსახლეობას - მათ არ უნდოდათ განაცხადის შეტანა ევროკავშირის წევრობისთვის და ქართველ ხალხს აქციები დაჭირდა ამისთვის, ისინი ანტიდასავლურ კამპანიაში და დეზინფორმაციაში იყვნენ ჩართულები, კობახიძე ამბობდა, რომ ჩალის ფასი აქვს ევროკავშირის რეზოლუციებს, კალაძე ამბობდა, რომ თუ არ მოგცემენ სტატუსს, რაც უნდა ის გააკეთონ. საქართველოს მოქალაქეს არ აქვს მოკლე მეხსიერება, ყველას კარგად გვესმის სად ვიყავით, სად ვართ და სად უნდა ვიყოთ 2024 წელს. ახლა რაც არ უნდა ისაუბროს ღარიბაშვილმა, მათმა მატარებელმა უკვე ჩაიარა და 2024 წელს დაწყებულ საქმეს ქართველი ხალხი მიიყვანს ბოლომდე,“ - განაცხადა ლევან ხაბეიშვილმა.
