აზერბაიჯანის რესპუბლიკის პრეზიდენტის ადმინისტრაციამ და სომხეთის რესპუბლიკის პრემიერ-მინისტრის აპარატმა ერთობლივი განცხადება გაავრცელეს.
„აზერბაიჯანის რესპუბლიკა და სომხეთის რესპუბლიკა იზიარებენ მოსაზრებას, რომ გაჩნდა ისტორიული შესაძლებლობა რეგიონში დიდი ხნის ნანატრი მშვიდობის მისაღწევად. ორივე ქვეყანა კიდევ ერთხელ ადასტურებს განზრახვას გაფორმდეს სამშვიდობო ხელშეკრულება, რომელიც დაფუძნებულია სუვერენიტეტისა და ტერიტორიული მთლიანობის პრინციპების პატივისცემაზე.
აზერბაიჯანის რესპუბლიკის პრეზიდენტის ადმინისტრაციასა და სომხეთის რესპუბლიკის პრემიერ-მინისტრის აპარატს შორის მოლაპარაკებების შედეგად მიღწეული იქნა შეთანხმება ორ ქვეყანას შორის ნდობის გასაძლიერებლად მნიშვნელოვანი ნაბიჯების გადადგმაზე“, - ნათქვამია განცხადებაში.
განცხადების თანახმად, „კეთილგანწყობის ნიშნად, აზერბაიჯანი 32 სომეხ, სომხეთი კი ორ აზერბაიჯანელ სამხედროს გაათავისუფლებს“.
ასევე „კეთილგანწყობის ჟესტის ნიშნად, სომხეთი გამოხატავს მხარდაჭერას აზერბაიჯანის რესპუბლიკის მიერ წარდგენილ განცხადებაზე გაერო-ს კლიმატის ცვლილების ჩარჩო კონვენციის მხარეთა კონფერენციის 29-ე სესიის მასპინძლობის შესახებ და ხსნის თავის კანდიდატურას“.
აზერბაიჯანი გამოხატავს მხარდაჭერას სომხეთის კანდიდატურის აღმოსავლეთ ევროპის ჯგუფის COP-ის ბიუროს წევრობისთვის.
„აზერბაიჯანის რესპუბლიკა და სომხეთის რესპუბლიკა გააგრძელებენ მოლაპარაკებებს ნდობის აღდგენის აქტივობებისთვის, რომლებიც უახლოეს მომავალში უნდა განხორციელდეს და მოუწოდებენ საერთაშორისო საზოგადოებას, მხარი დაუჭიროს მათ ძალისხმევას, რაც ხელს შეუწყობს ორ სახელმწიფოს შორის ურთიერთნდობის განმტკიცებასა და დადებით გავლენას მოახდენს მთელ სამხრეთ კავკასიის რეგიონზე“, - ნათქვამია განცხადებაში.
