ისრაელის მედიის ცნობებით, ისრაელში, ღაზის სექტორის მოსაზღვრე ქალაქებში და ისრაელის შეიარაღებული ძალების ბაზებზე, ასევე ლიბანთან მოსაზღვრე კიბუცებში დღის განმავლობაში უწყვეტი საჰაერო განგაშის ხმა ისმოდა.
მსხვერპლისა და დაშავებულების შესახებ ინფორმაცია არ ვრცელდება.
მედიის ცნობით, ღაზის სექტორიდან ქალაქ ბეერშების მიმართულებით სულ მცირე 10 რაკეტა ისროლეს, ქალაქის თავზე იმუშავა საჰაერო თავდაცვის სისტემა „რკინის გუმბათმა.“
მანამდე გამაფრთხილებელი სირენები გაისმა ნირ ოზსა და მაგენში ღაზის საზღვრის მახლობლად, ასევე ქალაქ აშქელონსა და მიმდებარე სოფლებში. ეს იყო პირველი შემთხვევა, როდესაც აშქელონი დაბომბეს ბოლო 18 საათის განმავლობაში. დაშავებულების შესახებ ინფორმაცია არ არის.
ერთი ადამიანი მსუბუქად დაიჭრა ნამსხვრევებით დღეს დილით, როდესაც ღაზიდან გასროლილი ჭურვი საზღვართან სოფელში მდებარე ქარხანას მოხვდა, რის შედეგადაც ხანძარი გაჩნდა.
გარდა ამისა, ისრაელის თავდაცვის ძალებში განაცხადეს, რომ სავარაუდოდ, იემენიდან გაშვებული რაკეტა წითელი ზღვის თავზე შორი დისტანციის საჰაერო თავდაცვის სისტემა Arrow-მ ჩაჭრა.
განგაშის სირენები ასევე გაისმა ეილათში, ისრაელის უკიდურეს სამხრეთ ქალაქში წითელი ზღვის სანაპიროზე, თუმცა ისრაელის თავდაცვის ძალები აცხადებს, რომ რაკეტა ისრაელის საჰაერო სივრცეში არ შევიდა და განგაში ამოქმედდა უსაფრთხოების პროტოკოლის შესაბამისად.
