საერთაშორისო რესპუბლიკური ინსტიტუტის (IRI) მიერ ჩატარებული საზოგადოებრივი აზრის კვლევის თანახმად, გამოკითხულთა 73% სრულად, ხოლო 13% ნაწილობრივ უჭერს მხარს ქვეყნის ევროკავშირში გაწევრიანებას.

კვლევის მიხედვით, თუკი EU-ში გაწევრიანებისთვის რუსეთთან სავაჭრო ურთიერთობების გაწყვეტა აუცილებელი წინაპირობა იქნებოდა, გაწევრიანების მომხრეებს შორის 55%-ის მხარდაჭერა სრულად უცვლელი დარჩებოდა, 19% კვლავ ევროკავშირს დაუჭერდა მხარს, მაგრამ ნაკლებად მყარად, ხოლო 9% ნაწილობრივ, 8% კი სრულად შეეწინააღმდეგებოდა ევროკავშირში გაწევრიანებას. 

ამავე კვლევის თანახმად, საქართველოს მოსახლეობის 65% სრულად, ხოლო 14% ნაწილობრივ ემხრობა NATO-ში გაწევრიანებას. 5% ნაწილობრივ, ხოლო 11% სრულად ეწინააღმდეგება ქვეყნის ალიანსში გაწევრიანებას.

EU-ში გაწევრიანების მომხრეებს შორის 45% ევროკავშირის მთავარ სარგებლად ეკონომიკის გაძლიერებას ასახელებს, NATO-ს შემთხვევაში კი ინტეგრაციის მსურველების 47% ყველაზე დიდ სარგებლად უსაფრთხოებას მოიაზრებს. 

IRI-ის მიხედვით, საქართველოს EU-ში გაწევრიანების მთავარ წინაღობად მოსახლეობის 27% ქვეყანაში პოლიტიკურ არასტაბილურობას ასახელებს, ხოლო 17% ამბობს, რომ უმთავრესი დაბრკოლება ქვეყნის შიგნით წინააღმდეგობაა. NATO-ს შემთხვევაში ყველაზე დიდ წინაღობად მოსახლეობის 27% რუსეთის მხრიდან წინააღმდეგობას, 20% კი ოკუპირებული რეგიონების სტატუსს მიიჩნევს. 

კვლევა ჩატარდა 2023 წლის 14 სექტემბერი-14 ოქტომბრის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ. კვლევის საველე სამუშაოები ჩატარდა IPM-ის მიერ. მონაცემები შეგროვდა პირისპირ ინტერვიუს გზით. შერჩევა მოიცავდა საარჩევნო ხმის უფლებისა და ასაკის მქონე 1200 რესპონდენტს. მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად. ცდომილების ზღვარი წარმოადგენს +/- 2.5 %, გამოპასუხების მაჩვენებელი – 73%. კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.