პარლამენტის პლენარული სხდომა დღეს ხმაურითა და დაპირისპირებით გაიხსნა.
შალვა პაპუაშვილმა „მოქალაქეების“ ლიდერი, დეპუტატი ალეკო ელისაშვილი დარბაზიდან გააძევა.
ალეკო ელისაშვილმა სხდომის დაწყებისთანავე სიტყვა ითხოვა და განცხადების გაკეთება ირაკლი ბერაიასთან დაკავშირებით სცადა, თუმცა პარლამენტის თავმჯდომარემ, შალვა პაპუაშვილმა მას მიკროფონი გაუთიშა, რასაც ხმაური და სიტყვიერი დაპირისპირება მოჰყვა.
ალეკო ელისაშვილმა ირაკლი ბერაიას სამარცხვინო უწოდა და თანამდებობიდან გადადგომისკენ მოუწოდებდა, შალვა პაპუაშვილმა კი ელისაშვილი დარბაზიდან გააძევა.
„ბატონო ალეკო, გუშინაც გითხარით, დაიოკეთ ნერვები. არ არის საჭირო. გუშინ იქნა ეს საკითხი განხილული, პასუხი ყველამ მიიღო. არ არის ახლა აქ საჭირო ზედმეტი ემოციები. ბატონო ალეკო, მიკროფონის გარეშე ნუ საუბრობთ. შენიშვნას ვაძლევ ალეკო ელისაშვილს. მანდატურს ვეუბნები, გაიყვანეთ ალეკო ელისაშვილი დარბაზიდან. გაძევებთ დარბაზიდან, ოქმში ჩანაწერი გააკეთეთ. გაძევებულია ალეკო ელისაშვილი. დატოვეთ დარბაზი, გაძევებული ხართ დარბაზიდან“, – განაცხადა შალვა პაპუაშვილმა.
