საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა 2010 წლის შედეგები შეაჯამა და 2011 წელს დაგეგმილი პროექტები წარადგინა. ღონისძიება პრემიერ მინისტრმა ნიკა გილაურმა გახსნა, რომელიც ფონდის სამეთვალყურეო საბჭოს თავმჯდომარეობს. წარმატებულ 190 პროექტში შედის დევნილებისთვის განხორციელებული პროექტებიც.
პრემიერ მინისტრმა აღნიშნა, რომ მსგავსი პროექტები ქვეყნის განვითარებისთვის აუცილებელია: „ჩვენი საბოლოო მიზანია ქვეყნის ეკონომიკური განვითარება. ძალიან ბევრი მნიშვნელოვანი სამუშაო შესრულდა თუნდაც დევნილებისთვის და ეს პროცესი 2011 წელსაც გაგრძლდება."
ფონდის აღმასრულებელი დირექტორის, ლევან ჭიჭინაძის თქმით, მთელი საქართველოს მასშტაბით, 2010 წელს დევნილებისთვის 3000-ზე მეტი საცხოვრებელი ობიექტის რეაბილიტაცია და აღდგენა მოხდა. რაც შეეხება 2011 წელს, მისივე თქმით: „წყალტუბოში 42 კორპუსში მიმდინარეობს მუშაობა, სადაც დევნილები ჩასახლდებიან. აჭარაში კი დაგეგმილია 52 კორპუსის მშენებლობა."
ოკუპირებული ტერიტორიებიდან იძულებით გადაადგილებუილ პირთა, განსახლებისა და ლტოლვილთა მინისტრმა აღნიშნა, რომ პროცესი მანამ გაგრძელდება, სანამ საცხოვრებელ ფართს ყველა დევნილი არ მიიღებს.
კობა სუბელიანი: „დონორების დახმარებით და მუნიციპალური განვითარების ფონდის მეშვეობით, რეგიონებში, კარკასულ მდგომარეობაში არსებული შენობები ბინებად გადაკეთდა და აფხაზეთიდან დევნილებს გადაეცათ. ასევე, გარემონტდა კოლექტიური ცენტრები. 2011 წელს რეგიონებში იგეგმება 60-მდე კარკასული შრნობის ბინებად გადაკეთება და ასევე აფხაზეთიდან დევნილებისთვის გადაცემა. რეგიონებში ასევე დაიწყება ახალი მშენებლობები. ასე რომ, რეგიონბში დევნილთა ბინით დაკმაყოფილების პროცესი მანამ გაგრძლდება, სანამ თითოეული დევნილი ოჯახი ფართით არ იქნება უზრუნველყოფილი."
ანგარიშის პრეზენტაციას პრეზიდენტის ადმინისტრაციის უფროსი, ფონდის სამეთვალყურეო საბჭოს თანათავმჯდომარე დავით ტყეშელაშვილი, რეგიონული განვითარებისა და ინფრასტრუქტურის მინისტრი, ფონდის სამეთვალყურეო საბჭოს თავმჯდომარე რამაზ ნიკოლაიშვილი, მთავრობის წევრები და საერთაშორისო ორგანიზაციის წარმომადგენლებიც დაესწრნენ.