ფრაქცია "ქრისტიან-დემოკრატების" წევრი ლევან ვეფხვაძე კობა სუბელიანის უწყებას დევნილების დედაქალაქიდან განსახლებასთან დაკავშირებით სამუშაო ჯგუფის შექმნას სთხოვს.
"დევნილების განსახლება სამართლიანობისა და კანონიერების პრინციპებს უნდა ეფუძნებოდეს. ამიტომ ვთხოვთ, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრს, შევქმნათ სამუშაო ჯგუფი და დევნილებთან ერთად მოვინახულოთ მათი სავარაუდო ჩასახლების ადგილები", - განაცხადა ლევან ვეფხვაძემ დღეს გამართულ ბრიფინგზე.
მისივე განმარტებით, დევნილების მხოლოდ საცხოვრებელი ფართით დაკმაყოფილება საკმარისი არ არის და საჭიროა გაირკვეს, რამდენად სრულდება კანონის მოთხოვნა, და ახალმოსახლენი იქნებიან თუ არა უზრუნველყოფილნი სამუშაო ადგილებითა და შესაბამისი სოციალური პირობებით.
ამასთან, მისი თქმით, სამუშაო ჯგუფში უნდა შევიდნენ როგორც საპარლამენტო უმრავლესობის და უმცირესობის წევრები, ასევე სამინისტროსა და დევნილთა წარმომადგენლები.