პატიმრები სასჯელააღსრუების დაწესებულებში ტელეფონით სარგებლობის უფლების განხორციელებასთან დაკავშირებით უკმაყოფილება გამოთქვამენ.
ამის შესახებ ნათქვამია სახალხო დამცველის სპეციალური პრევენციული ჯგუფის მიერ იმერეთის რეგიონის სასჯელაღსრულების დაწესებულების მონიტორინგი დასკვნაში.
"მონიტორინგის დროს ქუთაისის #2 დაწესებულებაში განთავსებული იყო 1551 პატიმარი. მათ შორის - 13 ქალი და 14 არასრულწლოვანი. მსჯავრდებულებთან გასაუბრებით ირკვევა, რომ მათი კარცერში მოთავსება ხდება 3-5 დღით. მონიტორინგის დროს სამარტოო საკანში განთავსებული იყო ერთი მსჯავრდებული. სამარტოო საკანში მოთავსებულ მსჯავრდებულს ჰქონდა ლეიბი და გადასაფარებელი. ამანათით დაშვებულია თეთრეულის, ხილის, მწვანილის, წიგნების, პრესის და ტანსაცმლის შეგზავნა. პატიმრებთან გასაუბრებით გაირკვა, რომ გასეირნების უფლებით სარგებლობენ შაბათ-კვირის გარდა ყოველდღე. აღნიშნული პრობლემა ყველა დახურული ტიპის სასჯელაღსრულების დაწესებულებაში დგას", - ნათქვამია დასკვნაში.
მათივე ინფორმაციით, პატიმრები აბანოთი სარგებლობენ კვირაში ერთხელ. ყველა პატიმარს აქვს რადიო. ტელევიზორის ყურების საშუალება ეძლევათ მხოლოდ ქალ პატიმრებს. პატიმრების ერთ-ერთი მთავარი მოთხოვნა დაწესებულებაში ტელევიზორების დაშვებაა.
არასრულწლოვან პატიმრებთან გასაუბრებით გაირკვა, რომ მათ შესაძლებლობა აქვთ, ყოველდღიურად ივარჯიშონ დაწესებულებაში არსებულ ტრენაჟორებზე.
ქუთაისის #2 დაწესებულებაში გაიხსნა ლაბორატორია, რომელიც შესაძლებლობას იძლევა, ადგილზე ჩატარდეს ისეთი თანამედროვე მაღალტექნოლოგიური კვლევა, როგორიცაა იმუნოფერმენტული ანალიზი (ELIშA). აღნიშნული მეთოდით მიმდინარეობს პატიმართა გამოკვლევა აივ ინფექციაზე. ადგილობრივმა ექიმმა გაიარა სპეციალური მომზადება ამ ტექნოლოგიის გამოყენებისთვის.
ამასთან, სამივე დაწესებულებაში პატიმრებმა უკმაყოფილება გამოთქვეს ტელეფონით სარგებლობის უფლების განხორციელებასთან დაკავშირებით - სისტემაში შემოსული ახალი ბარათით შესაძლებელია მხოლოდ ორ ნომერზე დარეკვა, რის შემდეგაც ბარათი იბლოკება მიუხედავად იმისა, ამოწურა თუ არა პატიმარმა კანონით განსაზღვრული 15 წუთიანი ლიმიტი და მისი ხელახალი გამოყენება შესაძლებელია მომდევნო თვეში. ამის გამო პატიმრები იძულებულები არიან, კანონით განსაზღვრული დროის სრულფასოვნად გამოყენებისთვის, შეიძინონ რამდენიმე ბარათი.
არცერთ დაწესებულებაში ექიმის ხელმისაწვდომობის თვალსაზრისით პატიმრებს პრეტენზია არ გამოუთქვამთ.
