"საქართველოსა და რუსეთის ურთიერთობების მომავალი კეთილმეზობლობა და ჭეშმარიტად პარტნიორული ურთიერთობებია", _ განაცხადა რუსეთის პრემიერ-მინისტრმა მოსკოვში პოკლონნაია გორაზე ქუთაისში დემონტირებული "დიდების მემორიალის" ანალოგის გახსნაზე.
"დარწმუნებული ვარ, არავის ძალუძს დააშოროს და გააბოროტოს რუსი და ქართველი ხალხი, გაწყვიტოს ტრადიციულად ჩვენი დამაკავშირებელი ადამიანური და სულიერი კვანძები. ეს კი იმას ნიშნავს, რომ ჩვენი მომავალი რუსეთისა და საქართველოს კეთილმეზობლობაში, თანასწორუფლებიანობაში და ჭეშმარიტად პარტნიორულ ურთიერთობებშია", _ განაცხადა პუტინმა და დასძინა - "ჩვენ ამისკენ გულწრფელად მივისწრაფით. ყველა ჩვენგანისთვის რუსეთ-საქართველოს მეგობრობა განუზომლად დიდი და უპირობო ფასეულობაა".
რუსული მედიის ინფორმაციით, პუტინმა გაიხსენა ის შემზარავი კადრები, რომლებიც ერთი წლის წინ მრავალ ტელეარხზე გავიდა და რომლებიც ქუთაისში "დიდების მემორიალის" დემონტაჟს ეხებოდა.
"სახელმწიფოებრივი ვანდალიზმის სამარცხვინო აქტმა უკიდურესად ნეგატიური და შემაშფოთებელი რეაქცია გამოიწვია მთელს მსოფლიოში და პირველ ყოვლისა საქართველოში. შეუძლებელია ხალხი იყოს მათთან ვინც ანგრევს ხსოვნას, მით უფრო საკუთარი გმირების ხსოვნას, ზურგს აქცევს საკუთარ ისტორიას და მეგობრობისა და მხარდაჭერის საუკუნოვან ტრადიციებს", _ განაცხადა პუტინმა.
