"ზოგი პოსტსაბჭოთა ქვეყნის პოლიტიკა მიმართული დიდი სამამულო ომის გმირების ღვაწლის დაკნინებისა და ანტირუსული პოლიტიკისკენ. დარწმუნებული ვარ, მალე ყოველივე ეს ნულამდე დავა და ჯანსაღი აზრი გაიმარჯვებს", _ ეს განცხადება რუსეთის პრემიერ-მინისტრმა ვლადიმერ პუტინმა დღეს მოსკოვში ქართველ ოპოზიციონერ ზურაბ ნოღაიდელთან შეხვედრისას გააკეთა.
ნოღაიდელი მოსკოვში, პოკლონნაია გორაზე, ქუთაისში დემონტირებული "დიდების მემორიალის" ანალოგის გახსნაზე იმყოფებოდა.
"დარწმუნებული ვარ, საქართველოსა და რუსეთის ურთიერთობები, ბოლო დროს მომხდარი ტრაგიკული მოვლენები და ძეგლების განადგურება - ყოველივე ეს არსებითად გაგრძელებაა იმ პოლიტიკისა, რომელიც საქართველოს ახლანდელმა ხელისუფლებამ აირჩია. პირდაპირ ეს ორი მოვლენა ერთმანეთთან დაკავშირებული არ არის - ეს უბრალოდ ერთი და იმავე პოლიტიკური ხაზის გამოვლინებაა. სამწუხაროდ, ზუსტად ასეთივე მიდგომა იკვეთება ყოფილი საბჭოთა კავშირის სხვა ქვეყნებშიც", _ განაცხადა ვლადიმერ პუტინმა და ზურაბ ნოღაიდელს მემორიალის ანალოგის გახსნის იდეის მხარდაჭერისთვის მადლობა გადაუხადა.
"ეს არსებითად, იმ იდეის აღორძინებაა, რომლის განადგურებაც ქუთაისში სცადეს", _ განაცხადა პუტინმა.
ნოღაიდელმა, რუსული მედიის ინფორმაციით, აღნიშნა, რომ ძეგლის დანგრევა ვანდალური აქტია. მისი თქმით, მოსკოვში გახსნილი მემორიალი საერთო გამარჯვებისა და ქუთაისში დანგრეული მემორიალის სინანულის სიმბოლოა.
"მჯერა, რომ სწორედ დღევანდელი დღე გახდება რუსულ-ქართული ურთიერთობების საფუძველი. არა ორი წლის წინანდელი მოვლენები (2008 წლის რუსეთ-საქართველოს ომი) და მემორიალის აფეთქება - არამედ სწორედ დღევანდელი დღე", _ განაცხადა ნოღაიდელმა, რასაც ვლადიმერ პუტინი დაეთანხმა და განაცხადა, რომ მასაც სწორედ ამის იმედი აქვს.
