"რესპუბლიკური პარტიის" წევრის ლევან ბერძენიშვილის შეფასებით, "ვარდების რევოლუციას სერიოზული შედეგი, რომელიც დადებითად შეიძლება შეფასდეს, არ მოჰყოლია".
"ვარდების ხელისუფლებამ" არ გაამართა და არცერთი დაპირება, რომელიც ხალხისთვის იქნა მიცემული, არ შესრულებულა. ახლა ხელისუფლება ტრაბახობს იმით, რომ კორუფცია აღმოფხვრილია. არ მახსოვს, რომ კორუფციის აღმოფხვრა ყოფილიყო დანაპირები. "ვარდების რევოლუცია" მოხდა იმისთვის, რომ კურსი შეცვლილიყო, ევროპასთან ჩვენი ინტეგრაცია მომხდარიყო - პრეზიდენტ სააკაშვილის პირველი ვადის განმავლობაში ნატოში უნდა შევსულიყავით, ახლა კი უკვე ევროკავშირის წევრიც უნდა ვიყოთ. ტერიტორიული მთლიანობაც უნდა აღგვედგინა და ერთი სიტყვით, კარგი ცხოვრება უნდა გვქონოდა. არც ერთი ეს დაპირება არ იქნა შესრულებული, რადგან სააკაშვილმა რევოლუციის პრინციპებს ორ თვეში უღალატა", - განუცხადა ბერძენიშვილმა "ჯი-ეიჩ-ენს" "ვარდების რევოლუციის" შედეგებზე კომენტირებისას.
მისივე განმარტებით, "რევოლუციის პრინციპების ღალატი მდგომარეობდა იმაში, რომ სააკაშვილმა ხელისუფლების უზურპაცია მოახდინა, დაარღვია კონსტიტუცია და ეს შევარდნაძის დროინდელ პარლამენტს გააფორმებინა, რომელიც ყველანაირი კანონის და ლოგიკის დარღვევით აამოქმედა, შემდეგ პარლამენტში დატოვა ის მაჟორიტარები, რომელთა უსამართლო არჩევის გამოც მოხდა რევოლუცია და ა.შ".
"ერთი სიტყვით ხალხს შეურაცხყოფა მიაყენა, ბოლოს კი მას სასტიკად დაერია. პიკი კი სააკაშვილის ხელისუფლების მისი მოღვაწეობის იყო რუსეთთან ომი და მასთან დამარცხება", - მიაჩნია ლევან ბერძენიშვილს.
შეგახსენებთ, რომ ხვალ, 23 ნოემბერს, "ვარდების რევოლუციიდან" 6 წელი სრულდება.
