ყარაბაღის ე.წ. ადმინისტრაციის წარმომადგენლის, დავით ბაბაიანის განცხადებით, რეგიონს დატოვებს და სომხეთში გადასახლდება ფაქტობრივად მთელი სომხური მოსახლეობა.
მთიანი ყარაბაღის 120 000 ეთნიკური სომეხი გაემგზავრება სომხეთში, რადგან მათ არ სურთ აზერბაიჯანის შემადგენლობაში ცხოვრება და ეშინიათ ეთნიკური წმენდის, - განუცხადა ბაბაიანმა სააგენტო Reuters-ს.
ბაბაიანს არაფერი უთქვამს იმაზე, თუ რა დრო დასჭირდება სომეხი მოსახლეობის გამოსვლას რეგიონიდან. ასევე არ გაკეთებულა ოფიციალური განცხადება რეგიონიდან შესაძლო მასობრივ გამოდინებაზე.
„ჩვენი ღარიბი ხალხის ბედი ისტორიაში შევა, როგორც სომეხი ხალხისა და მთელი ცივილიზებული სამყაროს სირცხვილი. ჩვენს ბედზე პასუხისმგებლებს ერთ მშვენიერ დღეს მოუწევთ პასუხის გაცემა ღვთის წინაშე თავიანთი ცოდვებისთვის“, – აცხადებს ბაბაიანი.
მანამდე აზერბაიჯანულმა მხარემ განაცხადა, რომ ყარაბაღში მცხოვრები სომხების უფლებებს დაიცავდნენ და მისცემდნენ ცხოვრების საშუალებას.
