საპარლამენტო უმრავლესობის ერთ-ერთი ლიდერის დავით დარჩიაშვილის შეფასებით, "ვარდების რევოლუციის" შემდეგ 6-წლიანი მმართველობის პერიოდში ადგილი ჰქონდა ცალკეულ შეცდომებსა და მტკივნეულ პროცესებსაც, თუმცა აქვე აცხადებს, რომ "ისინი შეუძლებელია არ ყოფილიყო".
"პოლიტიკური დარგების ყველა მიმართულებით თვისობრივი ცვლილებები იყო გასატარებელი. ამას ასობით და მეტი მოაზროვნე, პასუხისმგებლობით გამსწვალული ადამიანი სჭირდება. ბუნებრივია, რომ ზოგი თავის სიმაღლეზე ვერ აღმოჩნდებოდა, ზოგს შეცდომა მოუვიდოდა... ამას ახლდა ის გახმაურებული მკვლელობები, რომელზეც ასე აქტიურადაა საუბარი - საერთო პროცესში, საერთო ბრძოლაში ასეთი ტრაგიკურლი შემთხვევები ხდება. საკუთრების საკითხიც ხან ასე იდგა, ხან ისე, იყო ცალკეული შემთხვევები, როცა ადგილი ჰქონდა გადაცდომას ძალაუფლების გამოყენებაში, მაგრამ მიმაჩნია, რომ ეს არის შეცდომები და არა ძირითადი კურსი. ძირითადი კურსი მიმართული იყო მოდერნიზაციისკენ. რა თქმა უნდა, ცალკეული ტრაგიკული შემთხვევები, რომლებსაც არანაირი გამართლება არ აქვს, ხდებოდა. ამისთვის ადამიანები ისჯებოდნენ, ზოგს მიაჩნია, რომ არასათანადოდ, მაგრამ ეს სასამართლოს გადასაწყვეტია და არა მიტინგის. იყო 7 ნოემბერიც, მაგრამ ამავე დროს იყო ქვეყნის ჭაობიდან ამოყვანისა და სახელმწიფოს ჩამოყალიბების პროცესიც", - განმარტა "ჯი-ეიჩ-ენთან" საუბარში დარჩიაშვილმა.
შეგახსენებთ, რომ ხვალ, 23 ნოემბერს, "ვარდების რევოლუციიდან" 6 წელი სრულდება.
