კავკასიის გარემოსდაცვითი არასამთავრობო ორგანიზაციების ქსელმა (CENN) თბილისში ბეწვეულის მაღაზიის გახსნის თაობაზე საგანგებო განცხადება გაავრცელა. ასოციაციის განცხადებით, ბეწვეულით ვაჭრობა XXI საუკუნის მსოფლიოში, მიუღებელ, ბარბაროსულ საქმიანობად ითვლება და აღარ გამოიყენება მოდის ინდუსტრიის ლიდერების მიერ თანამედროვე მოდის ბიზნესში. ორგანიზაცია მოუწოდებს ყველა დაინტერესებულს მხარი დაუჭიროს და შეუერთდეს კამპანიას.
„ძალიან შეშფოთებულები ვართ თბილისში ახლახან გახსნილი ბეწვეულის მაღაზიის გამო. დღეს, როდესაც ლიბერალური ღირებულებების მქონე ქვეყნების წარმომადგენლები პერიოდულად იკრიბებიან იმ მიზნით, რომ დაამკვიდრონ ცხოვრების თანამედროვე სტილი „იმუშავე ბუნებასთან ერთად" და შეცვალონ ადამიანთა ცნობიერებაში მოძველებული, დღევანდელობასთან შეუთავსებელი მიდგომები ცოცხალ სამყაროსთან დამოკიდებულებაში, რაც გულისხმობს იმ სივრცის გადარჩენას, რომელიც ადამიანების საქმიანობის შედეგად ისედაც კატასტროფულად შემცირებულია, წარმოუდგენლად მიგვაჩნია ჩვენს ქალაქში, რომელსაც აქვს ამბიცია, იყოს ევროპული, ბეწვეულის მაღაზიის გახსნა და მისი ისეთი რეკლამირება, რომელიც მომხმარებელს ავიწყებს (ისიც არ არის გამორიცხული, რომ საერთოდ არ იცოდეს), რომ ცხოველებს, რომლებსაც ბეწვის მოპოვების გამო იჭერენ, ელექტროდენით, მომწამლავი აირით, ციანიდის ინიექციით, დეკომპრესიით ან კისრის გადატეხით ხოცავენ. ხანდახან კი, როცა ზემოთ ჩამოთვლილი მცდელობები მიზანს ვერ აღწევს, ცხოველს ცოცხლად ატყავებენ.
ეს უნდა იცოდნენ იმ ადამიანებმა, რომლებიც ბეწვის ქურქში გამოეწყობიან. მით უმეტეს, როცა მაღაზიის ადგილმდებარეობა თბილისის პოპულარულ სავაჭრო უბანში არასწორ ორიენტირს აძლევს მათ იმის თაობაზე, რომ ბეწვეულით ვაჭრობა, ბეწვეულის შეძენა არც მისაღებია, არც ჰუმანური და არც ლამაზი, რადგან არ არსებობს სილამაზე და მშვენიერება ჰუმანური საწყისის გარეშე.
მსგავსი მაღაზიის გახსნის თაობაზე გადაწყვეტილების მიღება ისეთ ქვეყანაში, როგორიც საქართველოა, სადაც 30-ზე მეტი საფრთხის ქვეშ მყოფი ძუძუმწოვრის სახეობა ბინადრობს, გამაოგნებელ გულგრილობაზე მიუთითებს.
ნუ გახდებით ბეწვეულის პროდუქციის რეალიზაციის გამო ცხოველთა ტანჯვისა და მკვლელობის თანამონაწილე. გთხოვთ, ერთხელ კიდევ დაფიქრდეთ და გადაწყვიტოთ, გსურთ თუ არა ასეთი სასტიკი და არაეთიკური ბიზნესის მხარდამჭერი იყოთ.
ჩვენ უარს ვამბობთ თქვენს მაღაზიაში ამ ნაწარმის შესყიდვაზე. აგრეთვე ვაცხადებთ, რომ აქტიურად ვიმუშავებთ ბეწვეულის ვაჭრობის წინააღმდეგ უწყვეტი ბოიკოტის მხარდასაჭერად", - ნათქვამია ასოციაცია CENN -ის განცხადებაში, რომლის ადრესატიც ბეწვეულის მაღაზია „მორო ქეის" თანამფლობელი ლალი მოროშკინაა.
კახეთის კახეთის საინფორმაციო ცენტრი უერთდება ასოციაცია CENN-ის ბოიკოტს ბეწვეულით ვაჭრობის წინააღმდეგ.
