საქართველოს სოფლის მეურნეობის მინისტრი ბაკურ კვეზერელი მიიჩნევს, რომ ამერიკული ხორბლის პროგრამა სურსათის ფასებს დაარეგულირებს.
„პროგრამა საშემოდგომო სამუშაოს დროს განხორციელდა და მის ფარგლებში დაითესა ამერიკული ხორბალი. იგი ნაწილობრივ მოაგვარებს ფასებისგან გამოწვეულ პრობლემებს და მინიმუმამდე შემცირებს ფასების ზრდის ტემპს", - აცხადებს კვეზერელი.
მინისტრის თქმით, 2012 წლისთვის ხორბლის ნაწილში უკვე იქნება საშუალება, მოხმარების 35 % უზრუნველვყოთ.
"ეს მნიშვნელივანია, რათა წლის განმავლობაში არ გვქონდეს პიკური ფასები. გარდა ამისა, სიმინდის პროგრამის განხორციელება დაიწყება თებერვალში, რაც საშუალებას მოგვცემს, მარცვლული კულტურები საექსპორტო პროდუქციად ვაქციოთ", - აღნიშნა კვეზერელმა.
შეგახსენებთ, რომ სს "საქართველოს სოფლის მეურნეობის კორპორაციამ" საქართველოში 2000 ტონა ხორბლის თესლის იმპორტი განახორციელა, რომლის რეალიზაცია ადგილობრივ ფერმერებზე 13-თვიანი კონსიგანაციისა და პირდაპირი ანგარიშსწორების პირობებით მოხდება.
კორპორაციამ ახალი ჯიშის ხორბლის თესლის შემოტანა საქართველოში არსებული ხორბლის დაბალი მოსავლიანობის გამო გადაწყვიტა, რომლის ძირითად მიზეზად შეიძლება დასახელდეს ქვეყანაში ხორბლის წარმოება მოძველებული სათესლე მასალის კვლავწარმოებით.
პროექტის ფარგლებში შეირჩა ხორბლის თესლის ამერიკული წარმოშობის ჯაგერის ჯიშის თესლი, რომელიც ხასიათდება შემდეგი ხარისხობრივი მაჩვენებლებით: არაგენმოდიფიცირებული, მაგარი, წითელი ფერის, საშემოდგომო, ფხიანი, ნახევრად ჯუჯა, რომელიც სწორი/გამართული ზრდით ხასიათდება.
პროექტით გათვალისწინებული თესლის რაოდენობა გათვლილია 10 000 ჰა მიწის ფართობზე დასათესად. ფერმერთა მხრიდან შესყიდვის სურვილის მიხედვით და განაცხადების გათვალისწინებით, ხორბლის დათესვა მოხდება ქვეყნის სამ რეგიონში: კახეთში, ქვემო ქართლში და შიდა ქართლში; სამივე რეგიონში ამ პროექტისთვის დაქირავებულია რეგიონალური საკონსულტაციო ფირმები, რომლებიც ხორბლის განაწილების პროცესში კოორდინაციას და რეკომენდაციას გაუწევენ თითოეულ ფერმერს. მათი წარმომადგენლები რეგიონებში მოახდენენ მიწის ნაკვეთების შერჩევით დათვალიერებას და ზოგადი რეკომენდაციების მომზადებას, შემდგომში ფერმერებში გავრცელების მიზნით. ასევე რეგიონებში შექმნილია ოთხი საჩვენებელი მიწის ნაკვეთი, სადაც ფერმერებისთვის მოეწყობა მინდვრის დღეები.
აღნიშნული პროექტის საბოლოო მიზნებია ქვეყანაში ხარისხიანი ხორბლის თესლის მნიშვნელოვანი მატება, სერთიფიცირებული პროდუქტის პოპულარიზაცია ფერმერთა შორის და ფერმერებისთვის ხორბლის წარმოების ახალი ტექნოლოგიებისა და რეკომენდაციების გაცემა.
