სამწუხაროდ, ვერ ვხედავთ მეგობრულ დამოკიდებულებას უკრაინის ხელისუფლების მხრიდან, მაგრამ ჩვენი მხრიდან დარჩება ცალმხრივი მეგობრობის რეჟიმი. ამას ვპირდებით ყველას, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.
მისი თქმით, ყველას ახსოვს, „ნაცმოძრაობის“ წარმომადგენლების განცხადებები, რომ უკრაინელი მაღალჩინოსნები, მართალია, ეთნიკურად ქართველი, მაგრამ უკრაინელი მაღალჩინოსნები პირდაპირ იყვნენ ჩართული იმ სპეცოპერაციაში, რომელიც უკავშირდებოდა სააკაშვილის საქართველოში გამგზავრებას.
კობახიძის თქმით, ამ ფონზე მით უმეტეს სამწუხაროა ის ახალი ნაბიჯები, რომლებიც იდგმება, მათ შორის უკრაინის რადას ახალი განცხადება.
„სამწუხაროა ასეთი დამოკიდებულება, თუმცა ჩვენ ვრჩებით ცალმხრივი მეგობრობის რეჟიმში უკრაინის ხელისუფლებასთან. სამწუხაროდ, ვხედავთ, რომ ჩვენი ქვეყნის საქმეებში არასწორი მიმართულებით ჩარევის მცდელობაა, რაც უბრალოდ არასწორია. ჩვენთვის ეს მიუღებელია. ჩვენ გვჭირდება ჯანსაღი ურთიერთობები. სამწუხაროდ, ვერ ვხედავთ მეგობრულ დამოკიდებულებას უკრაინის ხელისუფლების მხრიდან, მაგრამ ჩვენი მხრიდან დარჩება ცალმხრივი მეგობრობის რეჟიმი. ამას ვპირდებით ყველას“, – აღნიშნა კობახიძემ.
სააკაშვილის შეწყალებისა და სამკურნალოდ გადაყვანის საკითხზე უკრაინის რადამ სალომე ზურაბიშვილისა და ევროკავშირის ქვეყნების პარლამენტების სახელზე დადგენილების პროექტი მოამზადა.
