11 ივლისს თბილისის ფოტოგრაფიისა და მულტიმედიის მუზეუმი მასპინძლობს პირველ საერთაშორისო სიმპოზიუმს სახელწოდებით „სამხრეთ კავკასიის ადრეული ფოტოგრაფიული მემკვიდრეობა“, რომელიც თავს მოუყრის მკვლევარებსა და კურატორებს აზერბაიჯანიდან, საქართველოდან, სომხეთიდან და ამერიკის შეერთებული შტატებიდან.
სიმპოზიუმი მიმოიხილავს ადრეული ფოტოგრაფიის ისტორიას და მედიუმის განვითარებას სამხრეთ კავაკსიის რეგიონში ინდუსტრიალიზაციის ეპოქიდან საბჭოთა ოკუპაციამდე. სომეხი, აზერბაიჯანელი და ქართველი მკვლევრები გამართავენ პრეზენტაციებს და ისაუბრებენ რეგიონის ფოტოგრაფიულ მემკვიდრეობაზე, მის მოცულობაზე, მემკვიდრეობის შემნახველ ინსტიტუციებსა და საკითხის ისტორიოგრაფიაზე. მოხსენებები ასევე შეეხება კერძო და ინსტიტუციურ ფოტოგრაფიულ კოლექციებს და აშშ-ს კონგრესის ბიბლიოთეკის ფონდებს, სადაც სამხრეთ კავკასიის თემაზე მდიდარი ვიზუალური მასალა ინახება.
სიმპოზიუმის მიზანია წაახალისოს სამხრეთ კავკასიური ფოტოგრაფიის შესწავლა, გააღვივოს პროფესიული კავშირები მკვლევრებსა და დაწესებულებებს შორის მთელი რეგიონის მასშტაბით და ხელი შეუწყოს საზიარო კულტურული მემკვიდრეობის გააზრებას.
„სამხრეთ კავკასიის ადრეული ფოტოგრაფიული მემკვიდრეობა“ ეხმიანება თბილისის ფოტოგრაფიისა და მულტიმედიის მუზეუმის მიერ 2022 წელს ორგანიზებულ რეტროსპექტიულ გამოფენას „სამი ფერი — მწვანე, წითელი, ლურჯი“, რომელმაც კონგესის ბიბლიოთეკისა და საქართველოს ეროვნული არქივის კოლექციებში დაცული XIX საუკუნის მეორე ნახევრისა და XX საუკუნის დასაწყისის ფოტოები გააერთიანა.
სიმპოზიუმზე დასასწრებად მუზეუმი ეპატიჟება ფოტოგრაფიისა და ვიზუალური ისტორიის მკვლევრებს, კურატორებს, გალერისტებს და ფოტოგრაფიით დაინტერესებულ ფართო საზოგადოებას.
სიმპოზიუმის კურატორი: ნინო ძანძავა
პროექტი დაფინანსებულია საქართველოში აშშ-ს საელჩოს მიერ.
