სამედიცინო პერსონალს ფარმაცევტული კომპანიების დასახელების მქონე რეცეპტების ფორმის გამოყენება აღარ აეკრძალება.
აღსანიშნავია, რომ "ჯანმრთელობის შესახებ კანონპროექტში" შესატანი ცვლილების პირველადი ვარიანტის მიხედვით, სამედიცინო პერსონალს რეცეპტის გამოწერა ისეთ ბლანკზე, სადაც ფარმაცევტული კომპანიის სახელი ან მედიკამენტის დასახელება იყო აღნიშნული, ეკრძალებოდა, თუმცა კანონპროექტის საბოლოო ვარიანტიდან კომპანიების შესახებ შეზღუდვა ამოღებულია და მხოლოდ მედიკამენტის დასახელებიანი რეცეპტის შეზღუდვა რჩება.
ამასთან, კანონპროექტის მიხედვით, სამედიცინო დაწესებულება და ჯანმრთელობის დაცვის პერსონალი ვალდებულია დაიცვას შემდეგი ნორმები:Lარ შევიდეს გარიგებაში რომელიმე ფარმაცევტულ კომპანიასთან იმ მიზნით, რომ პირადი კომერციული ინტერესების სანაცვლოდ გამოიყენებს პაციენტებს ფარმაცევტული პროდუქციის გასავრცელებლად, ასევე იგი ვალდებულია პაციენტს წამლის ფართო არჩევანი შესაბამის განმარტებებით შესთავაზოს.
ასევე, სამედიცინო დაწესებულებებში იკრძალება ფარმაცევტული კომპანიებისა და მათი პროდუქციის რეკლამირება.
იმ შემთხვევაში, თუ სამედიცინო დაწესებულება ან ექიმი აღნიშნული ნორმების დარღვევაში იქნება შემჩნეული, პირველ ჯერზე 1000 ლარით, მეორე ჯერზე კი 2000 ლარით დაჯარიმდება.
აღნიშნულ კანონპროექტს პარლამენტი 17 დეკემბრის რიგგარეშე სხდომაზე მესამე მოსმენით დაამტკიცებს.