განსაკუთრებული მოწიწებით პატივისცემას ვუდასტურებ ჩვენს გმირ მებრძოლებს, დაუმარცხებელ დაჭრილ-დაშავებულ სამხედროებს. ქედს ვიხრი თქვენი გმირობის წინაშე, – ამის შესახებ საქართველოს პრემიერ-მინისტრმა, ირაკლი ღარიბაშვილმა მარო მაყაშვილის სახელობის სარეაბილიტაციო ცენტრში დაჭრილ-დაშავებული სამხედრო მოსამსახურეების დღისადმი მიძღვნილი კვირეულის გახსნის ღონისძიებაზე სიტყვით გამოსვლისას განაცხადა.
მისივე თქმით, ყველას ვალია, გმირი მებრძოლების მიმართ მადლიერება საქმით გამოხატოს.
„თავდაცვის მინისტრო, თავდაცვის ძალების მეთაურო, გენერლებო, ოფიცრებო, სერჟანტებო, პატივცემულო სტუმრებო, მინდა, ყველას მოგესალმოთ და მადლობა მოგახსენოთ მობრძანებისთვის. განსაკუთრებული მოწიწებით მინდა, პატივისცემა დავუდასტურო ჩვენს გმირ მებრძოლებს, დაუმარცხებელ, დაჭრილ-დაშავებულ სამხედროებს. ქედს ვიხრი თქვენი გმირობის წინაშე. ჩვენი მთავრობის სახელით, მადლობას გიხდით თქვენ მიერ გაღებული სისხლისთვის, ვაჟკაცობისთვის, თავდაუზოგავი შემართებისთვის, თავდადებისა და გმირობისთვის. ჩვენი მთავრობა თქვენთან ვალშია. მთავრობის, მთელი საზოგადოების ვალია, საქმით გამოვხატოთ თქვენ მიმართ მადლიერება.
ბოლო პერიოდში ჩვენ, ჩვენი სამინისტრო, მთავრობა ვცდილობთ, კონკრეტული საქმით გამოვხატოთ თქვენდამი დამოკიდებულება. იცით, რომ სპეციალურად თქვენთვის დავაწესეთ დაჭრილ-დაშავებული მებრძოლების დღე, რათა კიდევ ერთხელ სიმბოლურად აღვნიშნოთ, შევიკრიბოთ და თქვენ მიმართ მადლიერება გამოვხატოთ. მინდა, მადლიერება გამოვხატო და მადლობა გადაგიხადოთ თქვენი გაუტეხელი სულისთვის. მიუხედავად სირთულეებისა, თქვენ არ წყვეტთ ბრძოლას, მოღვაწეობას. მინდა, სიამაყით აღვნიშნო თქვენ მიერ მიღწეული წარმატებები სხვადასხვა სპორტულ შეჯიბრებაში. რა თქმა უნდა, ჩვენთვის ეს საამაყოა, და კიდევ ერთხელ ადასტურებთ, რომ თქვენი ქართული სული არის გაუტეხელი“, – განაცხადა ირაკლი ღარიბაშვილმა.
ამასთან, როგორც ირაკლი ღარიბაშვილმა აღნიშნა, ქართველმა ჯარისკაცებმა მაქსიმუმი გააკეთეს და ღირსეულად მოიხადეს ვალი ყველა მისიაში.
„მინდა, მადლიერებით აღვნიშნო და მივესალმო ჩვენს პარტნიორებს, განსაკუთრებით, ამერიკის შეერთებულ შტატებს. ჩვენ ერთად ძალიან ბევრი საქმე გავაკეთეთ. ეს შესანიშნავი ცენტრიც ჩვენი ერთობლივი მუშაობის შედეგია. რეგიონში შეიქმნა ერთ-ერთი სანიმუშო, სამაგალითო რეაბილიტაციის ცენტრი და სწორედ ჩვენი ამერიკელი მეგობრების დახმარების შედეგად შეიქმნა, ასევე ჩვენი თანამონაწილეობით. რა თქმა უნდა, ჩვენთვის ეს არის სიმბოლური გამოხატულება. თქვენ იმსახურებთ ყველაფერს საუკეთესოს. ასევე, მინდა, სიამაყით აღვნიშნო და კიდევ ერთხელ შევახსენო ჩვენ საზოგადოებას, ისევე როგორც საერთაშორისო პარტნიორებს, რომ საქართველომ და ქართულმა ჯარმა, ჩვენმა ჯარისკაცებმა გააკეთეს მაქსიმუმი, თავი არ დაზოგა არცერთმა სამხედრომ. ჩვენ ღირსეულად მოვიხადეთ ვალი ყველა მისიაში, იქნებოდა ეს ერაყის მისია, ავღანეთის თუ ცენტრალური აფრიკის რესპუბლიკაში ჩვენი მისია. ყველგან ვიყავით წარმოდგენილი ღირსეულად და ჩვენი გმირობით, შეუპოვრობით, გაუტეხელი სულით ვაჩვენეთ, რას ნიშნავს, იყო ერთგული და ღირსეული პარტნიორი. ჩვენ ეს ღირსეული პარტნიორობა, ერთგულება დავუმტკიცეთ ჩვენს პარტნიორებს, ამერიკელ მეგობრებს, ნატო-ს წევრ ქვეყნებს და მხარდამხარ ვომობდით, ვიბრძოდით, ვიცავდით საერთაშორისო მშვიდობას, ვებრძოდით ტერორიზმს. ამ ბრძოლებში ჩვენმა გმირმა ჯარისკაცებმა, მეომრებმა ყველაზე ძვირფასი გაიღეს – საკუთარი სისხლი. 32 გმირი შეეწირა ამ მისიას. კიდევ ერთხელ ქედს ვიხრი მათი ნათელი ხსოვნის წინაშე. ასეულობით ჩვენმა გმირმა ჯარისკაცმა, ჩვენმა ძმებმა გაიღეს ყველაზე ძვირფასი – ჯანმრთელობა.
საქართველო არის პირნათელი ყველას წინაშე. ჩვენ ყოველთვის ღირსეულად ვმოქმედებდით და ღირსეულად ვმოქმედებთ დღესაც. ჩვენ ამაყად წარმოვადგენდით ჩვენს ამაყ, თავისუფლებისმოყვარე ხალხს, ჩვენს ერს და სახელმწიფოს. ამიტომ, მინდა, კიდევ ერთხელ გამოვთქვა იმედი იმისა, რომ ჩვენი ღვაწლი და თქვენი ღვაწლი სათანადოდ იქნება დაფასებული. ყველა წარმატება, რომელსაც ჩვენმა ქვეყანამ მიაღწია, გეკუთვნით თქვენ, ეკუთვნის ჩვენს ჯარს, ეკუთვნის ჩვენს ხალხს და ქვეყანას. ჩვენი მთავრობა, რა თქმა უნდა, აგრძელებს ბრძოლას ამ მიმართულებით. ჩვენ ვართ მოწოდებული და მოტივირებული, ჩვენს პარტნიორებთან ერთად, გავაგრძელოთ ჩვენი ჯარის ტრანსფორმაციის, გაძლიერების პროცესი. ყოველთვის მადლიერებით აღვნიშნავთ იმ წვლილს და ღვაწლს, რომელიც მიუძღვით ჩვენს ამერიკელ პარტნიორებს, ნატო-ს წევრ ქვეყნებს ჩვენი ჯარის ტრანსფორმაციის, მომზადების პროცესში. ჩვენ ვართ მადლიერნი. მადლობას ვუხდი ჩვენს დაუმარცხებელ დაჭრილ-დაშავებულ მებრძოლებს, ჩვენს გმირ ჯარისკაცებს“, – განაცხადა პრემიერმა.
დაჭრილ-დაშავებული სამხედრო მოსამსახურეების დღე 30 ივნისს აღინიშნება. მარო მაყაშვილის სახელობის სარეაბილიტაციო ცენტრში დაჭრილ-დაშავებული სამხედრო მოსამსახურეების დღისადმი მიძღვნილი კვირეული ოფიციალურად გაიხსნა.
