„საქართველოს მოსახლეობას მიაჩნია, რომ მთავარი ევროპული პარტია არის „ერთიანი ნაციონალური მოძრაობა“, რასაც ადასტურებს დღევანდელი კვლევა, რომ პარტია ძლიერდება და არის მთავარი ძალა რუსული რეჟიმის წინააღმდეგ ბრძოლაში", - წერს „ერთიანი ნაციონალური მოძრაობის“ თავმჯდომარე ლევან ხაბეიშვილი სოციალურ ქსელში.
ლევან ხაბეიშვილი ეხმიანება Edison Research-ის საზოგადოებრივი აზრის გამოკითხვა, რომელიც მას ტელეკომპანია „ფორმულამ" დაუკვეთა.
გამოკითხვის თანახმად, დღეს რომ საპარლამენტო არჩევნები ტარდებოდეს, 37% ხმას მისცემდა „ქართულ ოცნებას“, ხოლო 25% - „ნაციონალურ მოძრაობას“.
ლევან ხაბეიშვილის თქმით, კვლევა ადასტურებს, რომ „ქართული ოცნება“ დამარცხდება.
„ყოველ ჯერზე, ყველა გამოკითხვა, ყველა კვლევა ადასტურებს, რომ "ერთიანი ნაციონალური მოძრაობა" არის მთავარი პროდასავლური - პროევროპული პარტია.
საქართველოს მოსახლეობას, ხალხს მიაჩნია, რომ მთავარი ევროპული პარტია არის ნაციონალური მოძრაობა. დღევანდელი კვლევა არის კიდევ ერთი დასტური, რომ "ერთიანი ნაციონალური მოძრაობა" ძლიერდება, ნაციონალური მოძრაობა არის მთავარი ძალა რუსული რეჟიმის, ივანიშვილის, პუტინისტების და სამშობლოს მოღალატეების წინააღმდეგ ბრძოლაში.
მნიშვნელოვანია და ობიექტურად გვიხარია სხვა პროდასავლური პარტიების გარკვეული შედეგი. რასაც მივესალმებით. მეტიც, უმნიშვნელოვანესია გარკვეული ერთობები შექმნან ნაციონალური მოძრაობის გარეშე და კიდევ უფრო გაძლიერდნენ.
ჩვენ ძლიერი, მთავარი პარტია ვართ და ცხადია ჩვენის მხრივ ვფიქრობთ გაძლიერებაზე, რასაც უპირობოდ მოვახერხებთ . უახლოესი თვეების განმავლობაში ენმ - ს გაძლიერების, მატების პროცესს საზოგადოება თავად ნახავს.
ეს კვლევა არის დასტური, რომ რუსული ოცნება დამარცხებულია. ახლა მთავარია სწორი სტრატეგია, სამიზნის გასწორება და ივანიშვილის და მისი პუტინისტური პარტიისგან მხოლოდ სახელიღა დარჩება.“ - წერს ლევან ხაბეიშილი.
