ტელეკომპანია „ფორმულის" დაკვეთით, საერთაშორისო კვლევითმა კომპანიამ Edison Research-მ საქართველოში ჩაატარა საზოგადოებრივი აზრის გამოკითხვა. გამოკვლევის შედეგების თანახმად, ქვეყნის მოსახლეობის უდიდესი უმრავლესობა ევროატლანტიკურ ინტეგრაციას მხარს უჭერს.

გამოკითხვის თანახმად, მოსახლეობის 85% ნატო-ში საქართველოს გაწევრებას ემხრობა.

შეკითხვაზე, მხარს უჭერთ თუ ეწინააღმდეგებით საქართველოს გაწევრებას ნატო-ში, პასუხები ასე გადანაწილდა:

მხარს ვუჭერ - 85%

ვეწინააღმდეგები - 15%

ამავე გამოკვლევით, მოსახლეობის დიდი უმრავლესობის აზრით, საქართველოს უსაფრთხოება დასავლეთთან მჭიდრო ურთიერთობის შემთხვევაში უკეთ უზრუნველყოფილი იქნება.

შეკითხვაზე, რომელ შემთხვევაში იქნება საქართველოს ეროვნული უსაფრთხოება უკეთ უზრუნველყოფილი, დასავლეთთან მჭიდრო ურთიერთობის შემთხვევაში, თუ რუსეთთან, შედეგები ასე განაწილდა:

დასავლეთთან - 78%

რუსეთთან - 13%

არცერთთან - 9%

Edison Research-ის გამოკვლევის თანახმად, მოსახლეობის 90% მხარს უჭერს ევროკავშირში გაწევრიანებას,10% - წინააღმდეგია.

როგორც გამოკვლევაშია აღნიშნული, მოსახლეობის 64% მიიჩნევს, რომ„ქართული ოცნება" არ აკეთებს საკმარისს ევროკომისიის მოთხოვნების შესასრულებლად.

გამოკვლევის ფარგლებში, პირისპირი გამოკითხვის მეთოდით, ქვეყნის მასშტაბით შემთხვევითი შერჩევით გამოიკითხა საქართველოში მცხოვრები 1500 საარჩევნო უფლების მქონე 18 წლისა და მეტი ასაკის ადამიანი (ოკუპირებული ტერიტორიების გარდა). ცდომილება არის +/- 3%.

საველე სამუშაოები მიმდინარეობდა 25 მაისი-14 ივნისის პერიოდში.