ვწუხვარ, რომ ცოტათი იმედგაცრუებული ვარ, მაგრამ მეორე მხრივ, ნამდვილად გულით მადლიერი ვარ ევროკავშირის, რომ გვეხმარებით ამ 30 წლის განმავლობაში ქცევისა და იმ სტანდარტების შეცვლაში, – ამის შესახებ „ქართული ოცნების“ წევრმა, მაია ბითაძემ ევროკავშირი-საქართველოს საპარლამენტო ასოცირების კომიტეტის სხდომაზე განაცხადა.
ბითაძის თქმით, რთულია საუკეთესო გზის პოვნა, როდესაც ხელისუფლება ერთი მხრივ ცდილობს, შეინარჩუნოს სტაბილურობა და მეორე მხრივ, ებრძოლოს პოლიტიკურ ტურბულენტობას და „ფეიკ ჰედლაინებს“, რომლებიც ძალიან დიდ სივრცეს ფარავს მედიის მეშვეობით.
“ჩვენ გვახსოვს ყველას, რა ხდებოდა ხელისუფლებაში „ქართული ოცნების“ მოსვლამდე. ყველას გვახსოვს, როგორი შეგრძნება იყო ტელეფონზე საუბრისაც რომ გვეშინოდა, ყველა ოჯახი იყო დაზარალებული, თითქმის ყველა ოჯახს ჰყავდა პატიმარი, ნაწამები წევრი და მაშინ არ გვახსოვს დიდი შეშფოთება პარტნიორებისგან საქართველოში ჰუმანიტარული მდგომარეობის თაობაზე. უდიდესი მადლობა, რომ გვეხმარებით, რომ შევცვალოთ ქცევა, რადგან ევროპული ინტეგრაცია ჩვენთვის უმნიშვნელოვანესია, მაგრამ კიდევ ერთხელ, მინდა, გთხოვოთ, გაიაზროთ რეალური სიტუაცია, რაც გვაქვს ქვეყანაში, რაც გვაქვს გეოპოლიტიკური და გეოგრაფიული მდგომარეობის გათვალისწინებით. ნამდვილად ბედნიერი ვარ, რომ კარი კვლავ ღიაა და იმედია, რომ ჩვენი მომავალი თანამშრომლობა მიგვიყვანს წლის ბოლომდე კანდიდატის სტატუსამდე და საბოლოოდ, დეპოლარიზაციამდე, რადგან ყველა ჩვენი პარტნიორის განცხადება იწვევს პოლარიზაციას, არა ყველა, მაგრამ განცხადება სათაურებით. მადლობა, ვწუხვარ, რომ ცოტათი იმედგაცრუებული ვარ, მაგრამ მეორე მხრივ, ნამდვილად გულით მადლიერი ვარ ევროკავშირის, რომ გვეხმარებით ამ 30 წლის განმავლობაში ქცევისა და იმ სტანდარტების შეცვლაში, რომელიც მოსახლეობის ცხოვრების დონეს აუმჯობესებს“{საქართველოს პირველი არხი}, – განაცხადა ბითაძემ.
