ნავთობპროდუქტების მწარმოებელთა, იმპორტიორთა და მომხმარებელთა კავშირი საქართველოში იმპორტირებული საწვავის ხარისხის შემოწმების შედეგებს აქვეყნებს.
როგორც კავშირის მიერ გამოქვეყნებულ ინფორმაციაშია აღნიშნული, კომპანია ,,სოკარ ჯორჯია პეტროლეუმის" მიერ იმპორტირებული აზერბაიჯანის რესპუბლიკის სახელმწიფო ნავთობკომპანიის წარმოებული ბენზინისა (რეგულარი) და დიზელის (ლ-62) საწვავის ხარისხობრივ შემოწმების შედეგად დადგინდა შემდეგი ფიზიკურ-ეკოლოგიური მახასიათებლები:
A-91 რეგულარის ტიპის ბენზინი: ოქტანური რიცხვი რეალურად შეადგენს 93 - 93,5 ერთეულს (საქართველოს მოქმედი კანონმდებლობით უნდა იყოს არანაკლებ 91 ერთეულისა); ტყვიის შემცველობა მასში ფაქტიურად არ არის - 0,0018 - 0,0020 ერთეული (მოქმედი კანონმდებლობით - უნდა იყოს არა უმეტეს 0,013 ერთეულისა); არომატული ნახშირწყალბადების მოცულობითი წილი შეადგენს 30,0 - 32,0 პროცენტს (საქართველოს მოქმედი კანონმდებლობით უნდა იყოს არა უმეტეს 45 პროცენტისა); ბენზოლის მოცულობითი წილი არის 2,8 - 3,2 პროცენტამდე (მოქმედი კანონმდებლობით უნდა იყოს არა უმეტეს 5 პროცენტისა); გოგირდის შემცველობა არის 300 - 320 ერთეული (მოქმედი კანონმდებლობით უნდა იყოს არა უმეტეს 500 ერთეულისა).
რაც შეეხება დიზელის საწვავის ლაბორატორიულ შედეგებს, ცეტანის რიცხვი შეადგენს 49 - 49,5 (მოქმედი კანონმდებლობით - არანაკლებ 45); აფეთქების ტემპერატურა - 66 - 68 0ჩ (მოქმედი კანონმდებლობით - არანაკლებ 62 0ჩ); გოგირდის მასური წილი - 314 - 316 (მოქმედი კანონმდებლობით - არა უმეტეს 350).
რაც შეეხება ევროპიდან იმპორტირებულ ბენზინის საწვავს, მასში გოგირდის შემცველობა მნიშვნელოვნად ნაკლებია და ის მერყეობს 3-10 PPM-ის ფარგლებში, ბენზოლი 1-ზე ნაკლებია, ფაქტიურად არ არის ტყვია და ძალიან დაბალია არომატული ნახშირწყალბადების კოეფიციენტი. შეიძლება ითქვას, რომ ევროპიდან ძირითადად შემოდის ევრო 4 - ევრო 5 საწვავი. აქედან გამომდინარე შეგვიძლია გავაკეთოთ დასკვნა, რომ ბოლო წლების განმავლობაში მნიშვნელოვნად გაუმჯობესდა საქართველოს ბაზარზე არსებული საწვავის ხარისხი და ვითარება შეიძლება შეფასებულ იქნას როგორც დამაკმაყოფილებელი.
