“ნაციონალური მოძრაობა“ და „ქართული ოცნება“ ერთმანეთის ლანძღვის გარდა, არაფერს აკეთებენ, მეტი არც არაფერი იციან, - ამის შესახებ „გირჩის“ წევრმა ალექსანდრე რაქვიაშვილმა საზოგადოებრივ მაუწყებელს განუცხადა.
მისი თქმით, ქვეყანაში პოლარიზაციას „ნაციონალური მოძრაობა“ და „ქართული ოცნება“ უწყობენ ხელს.
მისვე შეფასებით, ევროსაბჭოს რეზოლუცია სწორედ მათ მიმართ გზავნილია.
„ამ რეზოლუციას აკლია ის, რომ პოლარიზაციის დასრულება შინაარსობრივად ნიშნავს ძალაუფლების დათმობას და პოლიტიკიდან გასვლას, რადგან ეს ორი პარტია ერთმანეთის ლანძღვის გარდა, არაფერს აკეთებს. მეტი არც არაფერი იციან. ამომრჩეველს მათი შინაარსობრივი დებატები არ უნახავს. ერთმანეთის ლანძღვა რომ შეწყვიტონ, სალაპარაკო არ ექნებათ, ამ პროცესში ჩვენ კი გავიმარჯვებთ. ევრორეკომენდაციები რომ სრულდებოდეს, გეგმა უნდა იყოს, შემოდგომაზე რა ნაბიჯი უნდა გადაიდგას და გაზაფხულზე – რა. ნელ-ნელა, რამდენიმე წელში ისეთ სისტემას ავაწყობთ, რაც ევროპასთან თავსებადი იქნება, მაგრამ ახლა ამის მზაობაც არ ჩანს. ჯერ არ იკვეთება სურვილი, რომ დაპირისპირებულ მხარეებს დეპოლარიზაცია უნდათ“, – განუცხადა ალექსანდრე რაქვიაშვილმა საქართველოს პირველ არხს.
ევროსაბჭოს საპარლამენტო ასამბლეის თანამომხსენებლებმა საქართველოში ვიზიტის შემდეგ განცხადება გაავრცელეს.
"საქართველო გზაჯვარედინზეა. ჩვენ მოვუწოდებთ საქართველოს ხელისუფლებას და ყველა პოლიტიკურ ძალას, დაძლიონ უკიდურესი მტრობა და პოლარიზაცია, განზე გადადონ ვიწრო პარტიული ინტერესები და ერთობლივად იმუშაონ ყველა დაინტერესებულ მხარესთან ერთად ევროკომისიის მიერ დასახული რეფორმების 12 პრიორიტეტული მიმართულების განსახორციელებლად, რათა ქვეყანამ მიიღოს ევროკავშირის კანდიდატის სტატუსი", - ნათქვამია განცხადებაში
ევროსაბჭოს საპარლამენტო ასამბლეის დელეგაცია საქართველოში ვიზიტით 27-29 მატს იმყოფებოდა.