7-9 მარტის აქციებზე დაკავებული აქტივისტის, ლაზარე გრიგორიადისის ადვოკატის თქმით, გრიგორიადისს პენიტენციურ დაწესებულებაში თმა მისი ნების საწინააღმდეგოდ გადაპარსეს.
ლიკა ბითაძემ ჟურნალისტებთან დაკავებულის მონახულების შემდეგ ისაუბრა.
"ციხის პირობებში, პენიტენციურის პირობებში არის ნორმალურ პირობებში, როგორც თვითონ განმარტა, მაგრამ ერთადერთი შენიშვნა ჰქონდა იმასთან დაკავშირებით, რომ მე არ მინდოდა გადაპარსვა და გადამპარსეს თმაო"- თქვა ადვოკატმა.
ამასთან, როგორც ბითაძე ამბობს, დაკავებისას გრიგორიადისის უფლებები დაირღვა.
როგორც დაკავებულმა ადვოკატს უთხრა, იმ შემთხვევაში თუ იგი აღიარებით ჩვენებას არ მისცემდა, პოლიციელები მისი მეგობრის დაკავებით დაემუქრნენ.
"ვესაუბრეთ თავიდან ბოლომდე ლაზარეს, მოგვიყვა თითქმის თავიდან ბოლომდე. ცალსახად დაირღვა მისი უფლებები, პირველი დავიწყებ იმით, რომ მისი სურვილია რა თქმა უნდა, რომ გავაჟღერო. დაირღვა ადვოკატის ნაწილში, მან განმარტა, რომ იგი ითხოვდა ადვოკატს, რაზედაც მას ადვოკატი არ მოუყვანეს. არამარტო ეს, იყო ასეთი რამე, რომ დაკავებისას მას მიაწოდეს მისი ტელეფონი და უთხრეს, რომ დაერეკა ადვოკატისთვის მან რომ აკრიფა ტელეფონის კოდი, მომენტალურად გამოგლიჯეს ხელიდან, იმიტომ რომ უნდოდათ კოდის გაგება და ადვოკატთან არ დაარეკვინეს.
შემდგომ უკვე დეპარტამენტში ზემოთ, არ იცის სახელი და გვარი დეპარტამენტის ვინმე უფროსის, იმიტომ რომ ჰგავდა უფროსსო როგორც თვითონ ამბობს, შემოვიდა და მითხრაო, რომ ადვოკატს არ მოგიყვანთო და ამავე დროს ის, რომ თუ მე ჩვენებას არ მივცემდიო და რა თქმა უნდა ეს უნდა ყოფილიყო აღიარებითი ჩვენება, მაგ შემთხვევაში დააკავებდნენ ჩემს მეგობარს გიორგი ჯარიაშვილსო.
ამასთან დაკავშირებით თქვა, რომ ამ ეტაპზე ისევ დუმილის უფლებას გამოვიყენებო, აქციაში მონაწილეობას რა თქმა უნდა არ უარყოფს, თვითონ მონაწილეობას, რომ იყო იქ ნამდვილად, გამოვიყენებ დუმილის უფლებას და პირველივე სასამართლოზე მივცემ ჩვენებასო, რა იყო რეალურადო", - თქვა ლაზარე გრიგორიადისის ადვოკატმა.
