რადიკალური ოპოზიცია, რომელიც მაღალი ალბათობით, აქციების უკანა რიგში იდგა, ამოეფარა ახალგაზრდებს, ახალგაზრდები თავიანთი პოლიტიკური მიზნებისთვის გამოიყენეს. ცდილობდნენ მათ გამოყენებას, შემდეგ დაიმალნენ და როცა პროტესტმა კულმინაციას მიაღწია, რადიკალური ოპოზიციის არც ერთი ლიდერი იქ არ იყო, - ამის შესახებ საქართველოს პარლამენტის ვიცე-სპიკერმა, არჩილ თალაკვაძემ განაცხადა.
მისი თქმით, კანონი პირდაპირ ამბობს, რა ხდება მაშინ, როდესაც რომელიმე მოქალაქე გადის მშვიდობიანი პროტესტის ფარგლებიდან.
„ვხედავთ, რომ რადიკალური ოპოზიცია და მათთან დაკავშირებული მედია ცდილობს, დააჯეროს საზოგადოება, თითქოს ადამიანებზე ბენზინის გადასხმა, ცეცხლის მოკიდება, მოქალაქეების გადასახადებით ნაყიდი ავტომობილების დაწვა, პარლამენტში ხანძრის გაჩენა შეიძლება, გამართლებული იყოს რომელიმე ადამიანის ბიოგრაფიაზე, გარეგნობაზე მსჯელობით. აბსოლუტურად დამაზიანებელ, დემოკრატიისთვის, თავისუფალი საზოგადოებისთვის მიუღებელ ჭრილში გადააქვთ ეს საკითხი. სინამდვილეში, კანონი არ იცნობს ასეთ ცნებებს, რომ ვინმე იმის მიხედვით გათავისუფლდეს პასუხისმგებლობისგან ან მიეცეს პასუხისმგებლობაში, თუ რა მუსიკას უსმენს, რა გემოვნება აქვს, ვინ არიან მისი მეგობრები. ეს წარმოუდგენელია, კანონის მახინჯი გაგებაა. რეალურად, რადიკალური ოპოზიცია, რომელიც მაღალი ალბათობით, აქციების უკანა რიგში იდგა, ამოეფარა ახალგაზრდებს, ახალგაზრდები თავიანთი პოლიტიკური მიზნებისთვის გამოიყენეს. ცდილობდნენ მათ გამოყენებას, შემდეგ დაიმალნენ და როცა პროტესტმა კულმინაციას მიაღწია, რადიკალური ოპოზიციის არც ერთი ლიდერი იქ არ იყო. მათ პრაქტიკულად დატოვეს ეს ახალგაზრდები და გამოსაკვლევია, გასარკვევია, გამოძიებამ უნდა დაადგინოს, სინამდვილეში, ვინ იყვნენ ამ ძალადობის წამხალისებლები. არა მხოლოდ ისინი, ვინც ჩაიდინეს, არამედ ისინიც უნდა გამოჩნდნენ და მათაც უნდა აიღონ პოლიტიკური პასუხისმგებლობა, ვინც ეს ყველაფერი წაახალისა. არსებობს კანონი და კანონი პირდაპირ ამბობს, რა ხდება მაშინ, როდესაც რომელიმე მოქალაქე გადის მშვიდობიანი პროტესტის ფარგლებიდან. ამის გამართლება წარმოუდგენელია ისე, როგორც ამას აკეთებს რადიკალური ოპოზიცია და მის მიერ კონტროლირებადი მედია. დამაზიანებელია იმ პრინციპებისა და სახელმწიფოსთვის, რომელსაც ჩვენ ვაშენებთ და რომელსაც ჰქვია ევროპულ ღირებულებებზე დაფუძნებული სახელმწიფო“, – განაცხადა არჩილ თალაკვაძემ.
პოლიციამ მარტის საპროტესტო აქციების მონაწილე ლაზარე გრიგორიადისი 29 მარტს დააკავა. პროკურატურის მტკიცებით, 7 მარტს დაახლოებით 23:15 საათზე, შოთა რუსთაველის გამზირზე გამართული აქციის მიმდინარეობისას, გრიგორიადისმა 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით ორჯერ ისროლა ე.წ. მოლოტოვის კოქტეილი.
უწყება დაკავებულს ასევე ედავება, რომ მან 9 მარტს, ღამის საათებში ჭანტურიას ქუჩაზე განზრახ წაუკიდა ცეცხლი შინაგან საქმეთა სამინისტროს კუთვნილ ტოიოტა კოროლას მოდელის ავტომანქანას.
გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის "ა" ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს.
31 მარტს მას სასამართლომ წინასწარი პატიმრობა შეუფარდა.
