დავით კეზერაშვილი ჩვენ ნამდვილად არ გვაფინანსებს, ჩვენი ფინანსები გამჭვირვალეა, დაფინანსებას სახელმწიფო ბიუჯეტიდან ვიღებთ და სახელმწიფო აუდიტის სამსახურში ფინანსურ დეკლარაციას წარმოვადგენთ. არანაირი „შავი ბუღალტერია“ არ გვაქვს, - ამის შესახებ „სტრატეგია აღმაშენებლის“ წევრმა პაატა მანჯგალაძემ განაცხადა.
„ეს რომ ასე იყოს, ხელისუფლებას ვერ მოასწრებდა ჩვენ წინააღმდეგ შავი პიარის აგორებას. არ ვიცი, კეზერაშვილი ვის აფინანსებს, მაგრამ ინტერვიუში თქვა, რომ ბევრს დაეხმარა. თქვა, რომ პროდასავლურ ფლანგს ძალიან უჭირს და ფინანაური დახმარება მნიშვნელოვანია ამ ფლანგის გაძლიერებისთვის. მართალი გითხრათ, დავით კეზერაშვილის გავლენა არ მიგრძვნია, რაიმე არ ვთქვა, ან ვთქვა. შესაბამისად, თავისუფალი ვარ. შეიძლება, ვიღაცას აფინანსებს და მისი გავლენის ქვეშ არის. უნდა ვიცოდეთ, რა ფორმით დახმარებაზეა საუბარი, რადგან ფინანსური არ უხსენებია. ჰიპოტეტურად იმის თქმა, რომ ეს ადამიანი ოლიგარქია, რადგან ვიღაცას დაეხმარა, სწორი არ არის. ეს ადამიანი დახმარების ფორმების დამალვას არ აპირებს. ეს დახმარება კანონში რომ არ ჯდებოდეს, „ქართულ ოცნებას“ უკვე საქმეები ექნებოდა აღძრული“, – განაცხადა პაატა მანჯგალაძემ.
საქართველოს თავდაცვის ყოფილმა მინისტრმა, დავით კეზერაშვილმა ერთ-ერთი მედიის ეთერში განაცხადა: „ცოტა ადამიანია, ვინც ეხმარება პროდასავლურ ფლანგს. მე ვარ ერთ-ერთი და ვაპირებ, გავაგრძელო ბრძოლა ბოლომდე. არიან სამოქალაქო საზოგადოების სუბიექტებიც, რომლებსაც ხშირად სჭირდებათ დახმარება, ასეთი სურვილი თუ არსებობს იქითა მხრიდან, თავს ვალდებულად ვთვლი, რომ ეს გავაკეთო. პრინციპი არის ორი: უნდა იყოს აუცილებლად პროდასავლური, მეორე – უნდა იყოს სურვილი იქითა მხრიდან, რადგან მე არ დავდივარ და არ ვეძებ ადამიანებს, პარტნიორებს საქართველოში, ვისაც ვეხვეწები, რომ მოდით, მინდა, რაღაცით მოგეხმაროთ“.