მიხეილ სააკაშვილის ჯანმრთელობის შენარჩუნება თუ გვინდა, პოლიტიკური გადაწყვეტილება უნდა იყოს მიღებული, - ამის შესახებ სახალხო დამცველის კონსილიუმის წევრმა, გიორგი გრიგოლიამ განაცხადა.
"ჩვენ ჯერ კიდევ შარშან აპრილის დასკვნაში დავწერეთ, რომ ჩვენ პირობებში მისი გამოჯანმრთელება შეუძლებელია. ჩვენ პირობებში ის, რამაც ეს დაავადება გამოიწვია, სტრესი არ ეხსნება ადამიანს და რახან სტრესი არ ეხსნება და იმყოფება იმ გარემოში, რაშიც დაავადდა, არანაირი აზრი არ აქვს ერთი კლინიკიდან მეორეში გადაყვანას, ან კიდევ სადღაც სხვაგან ან ვიღაცის ჩამოყვანას. ჩვენი აზრი ჯერ კიდევ შარშან იყო ასეთი, რომ თუ ჩვენ გვინდა მიხეილ სააკაშვილის ჯანმრთელობა შევინარჩუნოთ და დავიცვათ, უმჯობესი იქნება რაღაც პოლიტიკური გადაწყვეტილება იყოს მიღებული", - თქვა გიორგი გრიგოლიამ.
სახალხო დამცველის კონსილიუმის წევრებმა მიხეილ სააკაშვილი კლინიკა "ვივამედში" დღეს, 2 აპრილს მოინახულეს.
კონსილიუმის წევრები მიხეილ სააკაშვილის ჯანმრთელობის მდგომარეობაზე დასკვნას 2 დღეში მოამზადებენ.
