არ შეიძლება, უბრალოდ, სიტყვა „გმირი“ ასეთი ფალსიფიკაციისთვის გავიმეტოთ, რომ ასეთ ადამიანებს, რომლებიც „მოლოტოვის კოქტეილებს“ ესვრიან პოლიციელებს, იმას შევარქვათ იგივე სახელი, რაც, მაგალითად, ჟიული შარტავას აქვს, - ამის შესახებ საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ 7-9 მარტის აქციასთან დაკავშირებით დაკავებული ლაზარე გრიგორიადისის შესახებ განაცხადა.
სარჯველაძის თქმით, ამ საკითხს ბევრი წახნაგი აქვს და აუცილებელია, ყველაფერს სწორი შეფასება მიეცეს, რისთვისაც არსებობს სამართლებრივი პროცედურები.
„ძალიან საყურადღებოა, რომ საქართველოში აქციებს საკმაოდ დატვირთული ისტორია აქვს. განსაკუთრებით, 80 წლების ბოლოდან მოყოლებული, ქართულ საზოგადოებას არასდროს მიუმართავს ისეთი ხერხებისთვის, როგორიც გამოყენებული იყო ამ დღეებში. სიმართლე გითხრათ, ასეთი არაბუნებრივი ქცევა ბევრი კითხვის დამბადებელი შეიძლება, იყოს. ასეთ ფონზე შეიძლება, გარკვეული ვარაუდები ჩამოგვიყალიბდეს, ხომ არ იყო ეს მართული ოპოზიციის იმ ნაწილის მხრიდან, რომელსაც მუდამჟამ ძალადობრივი ინსტრუმენტებით და ძალადობრივი მეთოდებით უნდა, მიაღწიოს საწადელს, რათა ხელისუფლება ხელში აიღოს, ხვდებიან, რომ არაძალადობრივი გზით ეს შეუძლებელია.
ფაქტია, იქ ადამიანებმა სრულიად არაბუნებრივი ნაბიჯები გადაგეს და ზოგიერთ შემთხვევაში იქ აშკარად გამოჩნდა, რომ ზოგიერთი ოპოზიციონერი ლიდერი, სამწუხაროდ, მაქსიმალურად აქეზებდა ასეთ ნაბიჯებს. ასევე, ვიხილეთ ადამიანები, რომლებიც ე.წ. მოლოტოვის კოქტეილებს ისროდნენ. როდესაც ამასთან დაკავშირებით პირველად გაჩნდა კითხვები, პირველი ვერსია, რაც ოპოზიციამ განავითარა, ის იყო, რომ აბრალებდნენ ხელისუფლებას, ესენი სუს-სგან მართული ადამიანები იყვნენო. შემდეგ გამოჩნდა, გაირკვა, ვინც იყო და ახლა სთავაზობენ საზოგადოებას სრულიად სხვა ინტერპრეტაციას და ამბობენ, რომ სინამდვილეში ეს ადამიანი გმირი არისო. როგორც არ უნდა ეცადონ ახლა ამ ადამიანის წარმოჩენას, როგორც გმირისას, არ შეიძლება, უბრალოდ, სიტყვა „გმირი“ ასეთი ფალსიფიკაციისთვის გავიმეტოთ, რომ ასეთ ადამიანებს, რომლებიც „მოლოტოვის კოქტეილებს“ ესვრიან პოლიციელებს, იმას შევარქვათ იგივე სახელი, რაც, მაგალითად, ჟიული შარტავას აქვს. არ შეიძლება, უბრალოდ, ასეთი რამ. ეს, მათ შორის, არის ამორალურობაც, გარდა იმისა, რომ სამართლებრივად აბსოლუტურად არასწორი მიდგომაა“, – განაცხადა სარჯველაძემ.
21 წლის ლაზარე გრიგორიადისს საქალაქო სასამართლომ წინასწარი პატიმრობა შეუფარდა. შემდეგი სხდომა 1-ლ მაისს ჩაინიშნა.
პოლიციამ გრიგორიადისი 29 მარტს დააკავა. პროკურატურის მტკიცებით, 7 მარტს დაახლოებით 23:15 საათზე, შოთა რუსთაველის გამზირზე გამართული აქციის მიმდინარეობისას, გრიგორიადისმა 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით ორჯერ ისროლა ე.წ. მოლოტოვის კოქტეილი.
უწყება დაკავებულს ასევე ედავება, რომ მან 9 მარტს, ღამის საათებში ჭანტურიას ქუჩაზე განზრახ წაუკიდა ცეცხლი შინაგან საქმეთა სამინისტროს კუთვნილ ტოიოტა კოროლას მოდელის ავტომანქანას.
გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის "ა" ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს.