„ვივამედის“ კლინიკურმა დირექტორის, ზურაბ ჩხაიძის განცხადებით, მიხეილ სააკაშვილი როგორც კი რამე გაუმჯობესებისკენ მიდის, მაშინვე უარი ცხადდება მედიკამენტური მკურნალობისა თუ სხვა პროცედურების გაგრძელებაზე. ამის შესახებ ის ჟურნალისტებს ესაუბრა.
მისი თქმით, სააკაშვილის სასიცოცხლო პარამეტრები ნორმის ფარგლებშია, მათ შორის, არტერიული წნევის მაჩვენებლები და რესპირატორული მაჩვენებლები, ასევე სააკაშვილს ჩაუტარდა ლაბორატორიული კვლევებიც და ანალიზებში განსაკუთრებული ცვლილებები არ აღენიშნება.
„ოჯახის წევრების განცხადებებზე კომენტარს ვერ გავაკეთებ, გუშინაც იყო რაღაც არასწორი ინფორმაცია მიწოდებული. უკვე ძალიან დამღლელი თემა გახდა ყოველდღიურად ამის გაშუქება, კვება, მიღება, არმიღება, ვერმიღება. რა თქმა უნდა, იღებს საკვებს მცირე რაოდენობით და მისთვის სასურველ საკვებს. ჩვენს შეთავაზებულ დიეტაზე ისევ უარს აცხადებენ და არ მიაქვთ ის შეთავაზებული, რაც უნდა მიიღოს პაციენტმა, მაგრამ ყველაზე მეტად რაც გვაწუხებს, არის ის, რომ სამკურნალო დაწესებულებაზე და სამკურნალო პროცედურებზე ამბობს უარს“, – განაცხადა ზურაბ ჩხაიძემ.
ჩხაიძის თქმით, კლინიკას მოწვეული ჰყავდა სპეციალისტი, რომელიც სააკაშვილს უტარებდა ფიზიოთერაპიულ პროცედურებს, როგორიცაა ელექტროსტიმულაცია, ელექტოფორეზი, მასაჟი და ა.შ.
„იყო საკმაოდ კარგი შედეგი, მაგრამ რამდენიმე სიანსის შემდეგ, პაციენტმა უარი განაცხადა გაგრძელებაზე. რომ გითხრათ, ჩვენ რამეს გვიხსნის-მეთქი, არა. მაგრამ ჩვენ ვხედავთ ფაქტს, როგორც კი რამე გაუმჯობესებისკენ მიდის, ეს იქნება მედიკამენტური მკურნალობა თუ სხვა პროცედურა, მაშინვე უარი ცხადდება გაგრძელებაზე“, – აღნიშნა ზურაბ ჩხაიძემ.
