სომხეთის განზრახვას შეუერთდეს სისხლის სამართლის საერთაშორისო სასამართლოს რომის სტატუტს, რუსეთისთვის მიუღებელია. ამის შესახებ რუსული მედია საგარეო საქმეთა სამინისტროზე დაყრდნობით იუწყება.
„მოსკოვში მიუღებლად მიაჩნიათ ოფიციალური ერევნის გადაწყვეტილება შეეურთდეს რომის სტატუტს, რუსეთის პრეზიდენტის მიმართ სისხლის სამართლის საერთაშორისო სასამართლოს მიერ უკანონო და იურიდიულად ბათილი ორდერების გაცემის ფონზე“, - განუცხადა რუსულ მედიას წყარომ.
წყაროს თქმით, სომხეთის მხრიდან აღნიშნული ნაბიჯები მოსკოვთან ორმხრივ ურთიერთობებზე უკიდურესად უარყოფითი შედეგები მოჰყვება
24 მარტს სომხეთის საკონსტიტუციო სასამართლოს თავმჯდომარემ არმან დილანიანმა განაცხადა, რომ საკონსტიტუციო სასამართლომ აღიარა სისხლის სამართლის საერთაშორისო სასამართლოს რომის სტატუტით გათვალისწინებული ვალდებულებები ძირითად კანონთან შესაბამისობაში. მისი თქმით, სასკონსტიტუციო სასამართლოს გადაწყვეტილება საბოლოოა და ის ძალაში გამოქვეყნებისთანავე შევა.
საკონსტიტუციო სასამართლოს გადაწყვეტილების შემდეგ რომის სტატუტის რატიფიციება ქვეყნის პარლამენტმა უნდა მოახდინოს.
17 მარტს სისხლის სამართლის საერთაშორისო სასამართლომ ვლადიმირ პუტინის დაკავების ორდერი გასცა.
სისხლის სამართლის საერთაშორისო სასამართლოს მოსამართლეების გადაწყვეტილებით, რუსეთის პრეზიდენტი უკრაინაში ომის დანაშაულების ჩადენაშია ეჭვმიტანილი.